छत्रपती संभाजीनगर (pragatbharat.com) : नाशिकमधील बहुचर्चित धर्मांतर प्रकरणातील मुख्य आरोपी निदा खान हिला आश्रय दिल्याचा ठपका ठेवत, एमआयएमचे (MIM) नगरसेवक मतीन पटेल यांच्या घरावर छत्रपती संभाजीनगर महानगरपालिकेने मोठी कारवाई केली आहे. महापालिका प्रशासनाने पहाटेच्या सुमारास मतीन पटेल यांचे घर बुलडोझर चालवून जमीनदोस्त केले. या कारवाईनंतर माजी खासदार इम्तियाज जलील यांनी मध्यरात्री कार्यकर्त्यांशी संवाद साधत प्रशासनावर आणि सत्ताधाऱ्यांवर गंभीर आरोप केले आहेत.
कारवाई आणि अनोखे स्वागत: महानगरपालिका प्रशासनाने यापूर्वी मतीन पटेल यांच्या घराला अतिक्रमण हटवण्याबाबत नोटीस बजावली होती. मात्र, कोणतीही पूर्वसूचना न देता २४ तासांच्या आत ही कारवाई करण्यात आल्याचा दावा मतीन पटेल यांच्या कुटुंबीयांनी केला आहे. विशेष म्हणजे, ज्यावेळी महापालिकेचे पथक कारवाईसाठी आले, तेव्हा पटेल कुटुंबाने अधिकार्यांचे हार घालून स्वागत केले. प्रशासकीय कारवाईला विरोध करण्याऐवजी त्यांनी शांततेच्या मार्गाने आपला निषेध नोंदवला.
इम्तियाज जलील यांचे प्रशासनावर सडेतोड सवाल: या कारवाईनंतर घटनास्थळी धाव घेत इम्तियाज जलील यांनी आक्रमक पवित्रा घेतला. समर्थकांशी संवाद साधताना ते म्हणाले, “जर न्यायालयाने ७ दिवसांचा वेळ दिला होता, तर प्रशासनाने २४ तासांचीही प्रतीक्षा का केली नाही? ही कारवाई सूडबुद्धीने केली जात असून एमआयएमला कमजोर करण्याचा हा प्रयत्न आहे.” पोलीस, सत्ता आणि प्रशासन हे त्यांच्या बाजूने असल्याने न्यायालयाच्या निर्णयालाही डावलले जात असल्याची नाराजी त्यांनी यावेळी व्यक्त केली.
‘कायदा सर्वांसाठी समान असावा’: इम्तियाज जलील यांनी मतीन पटेल यांची बाजू सावरून धरताना म्हटले की, मतीन हा त्यांचा अत्यंत विश्वासू सहकारी आहे. “आज घर पाडले जात आहे, पण आम्ही पुन्हा घर उभे करू. मात्र, जर कायदा सर्वांसाठी समान असेल, तर त्याची अंमलबजावणी केवळ ठराविक लोकांवरच का होते?” असा सवाल करत त्यांनी प्रशासनाच्या दुटप्पी भूमिकेवर प्रश्नचिन्ह उपस्थित केले. या कारवाईमुळे शहरात राजकीय वातावरण चांगलेच तापले असून नारेगाव परिसरात मोठा पोलीस बंदोबस्त तैनात करण्यात आला आहे.