मुंबई (pragatbharat.com) : मान्सूनच्या संभाव्य आगमनापूर्वी राज्यातील आरोग्य विभागाने कीटकजन्य आजारांचा प्रसार रोखण्यासाठी कंबर कसली आहे. डेंग्यू, मलेरिया आणि चिकनगुनिया यांसारख्या आजारांचा प्रादुर्भाव पावसाळ्यात वाढू नये, यासाठी राज्याभरात विशेष ‘अॅक्शन प्लॅन’ राबवण्यात येणार आहे. महापालिका आणि जिल्हा परिषद प्रशासनाला तातडीने प्रतिबंधात्मक उपाययोजना करण्याचे निर्देश देण्यात आले आहेत.
घराघरांत होणार सर्वेक्षण आरोग्य कर्मचाऱ्यांची पथके आता घरोघरी जाऊन डासांच्या उत्पत्ती स्थानांची तपासणी करणार आहेत. ज्या ठिकाणी पाणी साचलेले आढळेल, तिथे औषध फवारणी आणि ‘गप्पी मासे’ सोडण्याचे नियोजन करण्यात आले आहे. विशेषतः बांधकामे सुरू असलेल्या जागा, टायरची दुकाने आणि भंगार साठवलेल्या ठिकाणांवर आरोग्य विभागाची करडी नजर असणार आहे. नागरिकांनी आठवड्यातून किमान एक दिवस ‘कोरडा दिवस’ म्हणून पाळावा आणि घरातील हौद, कुलर व कुंड्यांमधील पाणी उपसावे, असे आवाहन करण्यात आले आहे.
रक्त चाचण्या आणि औषधसाठा सज्ज राज्यातील सर्व ग्रामीण रुग्णालये आणि प्राथमिक आरोग्य केंद्रांमध्ये तापाच्या रुग्णांसाठी स्वतंत्र कक्ष स्थापन करण्याचे आदेश देण्यात आले आहेत. डेंग्यू आणि मलेरियाच्या चाचण्यांसाठी आवश्यक असलेल्या रक्त तपासणी कीट आणि औषधांचा पुरेसा साठा उपलब्ध करून देण्यात आला आहे. खासगी रुग्णालयांनी देखील संशयित रुग्णांची माहिती तात्काळ सरकारी यंत्रणेला देणे बंधनकारक करण्यात आले आहे. वेळीच खबरदारी घेतल्यास पावसाळ्यातील साथरोगांवर नियंत्रण मिळवणे शक्य होईल, असा विश्वास आरोग्य संचालकांनी व्यक्त केला आहे.