पुणे (हडपसर) (pragatbharat.com) : पुणे शहरात गुन्हेगारीने पुन्हा एकदा डोके वर काढले असून, हडपसरमधील गंगानगर परिसरात एका कुख्यात तडीपार गुंडाची निर्घृण हत्या करण्यात आली आहे. राणा कांबळे असे मृत गुंडाचे नाव असून, पूर्ववैमनस्यातून आणि वर्चस्वाच्या वादातून ही हत्या झाल्याचे प्राथमिक तपासात समोर आले आहे. या घटनेचा अंगावर काटा आणणारा सीसीटीव्ही (CCTV) व्हिडिओ पोलिसांच्या हाती लागला आहे.
नेमकी घटना काय? मिळालेल्या माहितीनुसार, मृत राणा कांबळे हा पोलिसांच्या रेकॉर्डवरील गुन्हेगार असून त्याला शहरातून तडीपार करण्यात आले होते. मात्र, तो नियमांचे उल्लंघन करून परिसरात वावरत होता. बुधवारी मध्यरात्रीच्या सुमारास ओम मोरे आणि त्याच्या दोन साथीदारांनी राणा कांबळेला गंगानगर भागात गाठले. त्यांच्यात सुरुवातीला शाब्दिक चकमक झाली, ज्याचे रूपांतर नंतर हिंसक हाणामारीत झाले. ओम मोरे आणि त्याच्या साथीदारांनी जवळ असलेल्या कोयत्यांनी राणावर सपासप वार केले. रक्ताच्या थारोळ्यात पडलेल्या राणाचा जागीच मृत्यू झाला.
दहशतीचे वातावरण: भरवस्तीत घडलेल्या या प्रकारामुळे हडपसर परिसरात मोठी खळबळ उडाली आहे. हडपसर पोलिसांनी तातडीने घटनास्थळी धाव घेत पंचनामा केला असून मृतदेह उत्तरीय तपासणीसाठी ससून रुग्णालयात पाठवला आहे. आरोपींच्या शोधासाठी पोलिसांनी पथके रवाना केली असून सीसीटीव्ही फुटेजच्या आधारे तपास सुरू आहे. शहरात तडीपार गुंडांचा वावर वाढल्याने नागरिकांमध्ये भीतीचे वातावरण आहे.