पुणे (pragatbharat.com) : पुण्याच्या चंदननगर भागात आज एक अत्यंत धक्कादायक हत्येची घटना उघडकीस आली आहे. एका नामांकित वकिलाच्या पत्नीने (स्वाती संजय सावंत, ४२) आपल्या पतीच्या कार्यालयात काम करणाऱ्या ३५ वर्षीय सेक्रेटरीची (पूनम दिनेश मुन) निर्घृण हत्या केली आहे. प्राथमिक तपासानुसार, आरोपी स्वाती सावंत यांना आपल्या पतीचे पूनम यांच्यासोबत अनैतिक संबंध असल्याचा संशय होता, ज्यातून त्यांनी हे टोकाचे पाऊल उचलले.
पूनम या रात्री उशिरापर्यंत घरी न परतल्याने त्यांच्या पतीने शोध घेतला असता, वकिलाच्या कार्यालयात त्या रक्ताच्या थारोळ्यात मृतावस्थेत आढळल्या. धक्कादायक बाब म्हणजे, आरोपीने हत्येनंतर पुरावा नष्ट करण्यासाठी मृतदेह गोणीत भरून लपवण्याचा प्रयत्न केला होता. चंदननगर पोलिसांनी तात्काळ कारवाई करत आरोपी स्वाती सावंत यांना ताब्यात घेतले आहे. या थरारामुळे पुणे शहरात मोठी खळबळ उडाली असून पोलीस अधिक तपास करत आहेत.