मुंबई (pragatbharat.com) : मुंबईत मान्सूनपूर्व पावसाच्या पहिल्याच हजेरीने मुंबई महानगरपालिकेच्या (BMC) दाव्यांची पोलखोल झाली आहे. बुधवारी सकाळी झालेल्या पूर्व-मोसमी पावसामुळे अंधेरी सब-वे परिसरात मोठ्या प्रमाणात पाणी साचल्याने वाहतूक पूर्णपणे विस्कळीत झाली. खबरदारीचा उपाय म्हणून सकाळी ७.४० वाजता हा सब-वे वाहतुकीसाठी बंद करावा लागला. या समस्येवर कायमस्वरूपी तोडगा काढण्यासाठी आता भाजप आमदार अमित साटम यांच्या पुढाकाराने अंधेरी परिसरात ५०० कोटी रुपये खर्चाच्या ३ मोठ्या भूमिगत पाणी साठवण टाक्या उभारण्याचा प्रस्ताव पालिकेसमोर ठेवण्यात आला आहे.
विशेष म्हणजे, हाच मॉडेल यापूर्वी हिंदमाता परिसरातील पूरस्थितीवर नियंत्रण मिळवण्यासाठी तत्कालीन मंत्री आणि शिवसेना (UBT) नेते आदित्य ठाकरे यांच्या पुढाकाराने राबविण्यात आला होता. हिंदमाता येथील भूमिगत टाक्यांचा प्रयोग अत्यंत यशस्वी ठरल्याने, आता विरोध विसरून अंधेरीसाठी देखील याच ‘आदित्य पॅटर्न’ किंवा सूत्राचा स्वीकार भाजपकडून केला जात असल्याची राजकीय वर्तुळात चर्चा आहे. प्रस्तावित ३ टाक्यांची एकूण पाणी साठवण क्षमता सुमारे ४१ हजार घनमीटर असणार आहे. आकडेवारीनुसार, सन २०२३ मध्ये २१ वेळा, २०२४ मध्ये २५ वेळा, तर २०२५ मध्ये तब्बल २२ वेळा अंधेरी सब-वे पाण्याखाली गेला होता.
दुसरीकडे, हवामान विभागाने मुंबईकरांसाठी एक अत्यंत महत्त्वाची सूचना जारी केली आहे. यंदाच्या पावसाळ्यात (जून ते सप्टेंबर) मुंबईतील अरबी समुद्रात तब्बल २४ वेळा मोठी भरती (High Tide) येणार आहे. यादरम्यान समुद्रात साडेचार मीटरपेक्षा अधिक उंचीच्या लाटा उसळणार आहेत. यंदाच्या मोसमातील सर्वाधिक उंचीच्या लाटा १६ जुलै २०२६ रोजी उसळणार असल्याचा अंदाज आहे. भरतीचा काळ आणि मुसळधार पाऊस एकाच वेळी आल्यास मुंबईत पूरस्थिती निर्माण होऊ शकते, त्यामुळे महानगरपालिका प्रशासनाने नागरिकांना समुद्रकिनाऱ्यालगत जाणे टाळण्याचे आवाहन केले आहे.
