मुंबई (pragatbharat.com) : मुंबई पोलिसांच्या गुन्हे शाखेने (Crime Branch) अमली पदार्थ तस्कराविरोधात एक मोठी आणि यशस्वी मोहीम राबवली आहे. गुन्हे शाखेच्या युनिट ११ ने (कांदिवली पश्चिम) मालाड आणि नवी मुंबई परिसरात संयुक्त छापे टाकून ५२ लाख ७ हजार ४०० रुपये किमतीच्या प्रतिबंधित कोडीन फॉस्फेटयुक्त कफ सिरपच्या (Codeine Phosphate Cough Syrup) तब्बल ४,७३४ बाटल्या जप्त केल्या आहेत. या धडक कारवाईत एका १७ वर्षीय अल्पवयीन मुलासह चार जणांना अटक करण्यात आली आहे.
गुप्त माहितीच्या आधारे मालाडमध्ये पहिली कारवाई: मिळालेल्या अधिकृत माहितीनुसार, मालाड पश्चिम येथील एस. व्ही. रोडवरील इंडियन ऑईल पेट्रोल पंपासमोर असलेल्या राज्यदेवी गजानन गुप्ता ट्रस्टजवळ काही जण अमली पदार्थांची विक्री करण्यासाठी येणार असल्याची गोपनीय माहिती गुन्हे शाखा युनिट ११ ला मिळाली होती. या माहितीच्या आधारे पोलिसांनी शनिवारी दुपारी २ च्या सुमारास सापळा रचून आरोपींना ताब्यात घेतले. सुरुवातीला त्यांच्याकडून नशेसाठी वापरल्या जाणाऱ्या कोडीन सिरपच्या १५३ बाटल्या जप्त करण्यात आल्या. अटक करण्यात आलेल्या आरोपींमध्ये दोन जण २६ वर्षांचे, एक २३ वर्षांचा आणि चौथा १७ वर्षांचा अल्पवयीन मुलगा आहे.
नवी मुंबईतील घरावर छापा, साठा जप्त: ताब्यात घेतलेल्या आरोपींची सखोल चौकशी केली असता, या रॅकेटचे धागेदोरे नवी मुंबईपर्यंत पसरल्याचे समोर आले. पोलिसांनी त्वरित एका आरोपीच्या नवी मुंबई येथील निवासस्थानी छापा टाकला. या छाप्यात पोलिसांना आणखी ४,५८१ कोडीन सिरपच्या बाटल्या सापडल्या. या संपूर्ण कारवाईत एकूण ५२,०७,४०० रुपयांचे सिरप आणि गुन्ह्यात वापरलेली १ लाख रुपयांची मोटारसायकल असा एकूण ५३ लाख ७ हजार ४०० रुपयांचा मुद्देमाल जप्त करण्यात आला आहे. या प्रकरणी मालाड पोलीस ठाण्यात अमली पदार्थ विरोधी कायदा, १९८५ (NDPS Act) च्या विविध कलमांनुसार गुन्हा दाखल करण्यात आला आहे.
वरिष्ठ अधिकाऱ्यांच्या मार्गदर्शनाखाली मोहीम: ही धडक कारवाई मुंबई पोलीस आयुक्त देवेन भारती आणि संयुक्त पोलीस आयुक्त (गुन्हे) अनिल कुंभारे यांच्या मार्गदर्शनाखाली करण्यात आली. गुन्हे शाखेचे पोलीस निरीक्षक गणेश माळी आणि युनिट ११ च्या पथकाने ही कामगिरी चोख बजावली. कोडीनयुक्त कफ सिरप हे औषध नियंत्रक कायद्यांतर्गत येत असले, तरी तरुण पिढीमध्ये नशेसाठी याचा बेकायदेशीर वापर वाढत चालला आहे. या पार्श्वभूमीवर मुंबई पोलिसांची ही कारवाई तस्करांचे कंबरडे मोडणारी ठरणार आहे.
