मुंबई (pragatbharat.com) : आगामी विधान परिषद निवडणुकीसाठी मुख्यमंत्री एकनाथ शिंदे यांनी आपली राजकीय रणनीती आखायला सुरुवात केली आहे. शिंदेंनी शिवसेनेच्या वाट्याला येणाऱ्या दोन जागांसाठी डॉ. नीलम गोऱ्हे आणि प्रहार जनशक्ती पक्षाचे प्रमुख बच्चू कडू या दोन मातब्बर मोहऱ्यांची निवड केल्याची चर्चा राजकीय वर्तुळात रंगली आहे. मात्र, या निर्णयाला आता खुद्द शिवसेनेच्या (शिंदे गट) अंतर्गत गोटातूनच तीव्र विरोध होऊ लागला आहे.
मिळालेल्या माहितीनुसार, विधान परिषदेच्या या जागांवर ‘बाहेरच्या’ नेत्यांना संधी देण्याऐवजी पक्षातील निष्ठावान कार्यकर्त्यांना झुकते माप द्यावे, अशी मागणी शिंदे गटातील काही मंत्र्यांनी आणि ज्येष्ठ नेत्यांनी लावून धरली आहे. विशेषतः बच्चू कडू यांच्या नावावर पक्षातील अनेक नेते नाराज आहेत. या नाराजीच्या पार्श्वभूमीवर, शिंदेंच्या काही आक्रमक नेत्यांनी बच्चू कडूंना उमेदवारी देण्यासाठी एक महत्त्वाची आणि जाचक अट समोर ठेवली आहे. ती अट म्हणजे, ‘बच्चू कडू यांनी त्यांचा प्रहार जनशक्ती हा स्वतंत्र पक्ष बरखास्त करून तो अधिकृतपणे शिवसेनेत (शिंदे गट) विलीन करावा’.
“जर आमदारकी शिवसेनेच्या कोट्यातून दिली जाणार असेल, तर तो उमेदवार पूर्णपणे शिवसेनेचाच असावा, अन्य पक्षाचा नको,” अशी ठाम भूमिका या नेत्यांनी घेतली आहे. बच्चू कडू यांनी अद्याप या अटीवर कोणतीही अधिकृत प्रतिक्रिया दिलेली नाही. मात्र, या अंतर्गत विरोधामुळे मुख्यमंत्री शिंदे यांच्यासमोर मोठा पेच निर्माण झाला आहे. निष्ठावंतांचा राग शांत करायचा की मित्रपक्षाला दिलेला शब्द पाळायचा, याकडे आता सर्वांचे लक्ष लागले आहे.