वॉशिंग्टन (pragatbharat.com) : अमेरिकेची राजधानी वॉशिंग्टन डीसी येथील राष्ट्राध्यक्षांचे अधिकृत निवासस्थान असलेल्या ‘व्हाईट हाऊस’ (White House) परिसरात एका बंदूकधाऱ्याने केलेल्या गोळीबारामुळे प्रचंड खळबळ उडाली आहे. या घटनेनंतर सुरक्षा रक्षकांनी केलेल्या प्रत्युत्तराच्या गोळीबारात संशयित हल्लेखोर ठार झाला आहे. या अत्यंत संवेदनशील घटनेच्या वेळी अमेरिकेचे राष्ट्राध्यक्ष डोनाल्ड ट्रम्प (US President Donald Trump) व्हाईट हाऊसच्या आतच उपस्थित होते, मात्र ते पूर्णपणे सुरक्षित आहेत. या तत्पर कारवाईबद्दल राष्ट्राध्यक्ष ट्रम्प यांनी गुप्तहेर सेवा (Secret Service) आणि कायद्याची अंमलबजावणी करणाऱ्या यंत्रणांचे जाहीर आभार मानले आहेत.
ट्रुथ सोशलवरून राष्ट्राध्यक्षांची प्रतिक्रिया: या घटनेनंतर राष्ट्राध्यक्ष डोनाल्ड ट्रम्प यांनी त्यांच्या ‘ट्रुथ सोशल’ (Truth Social) या सोशल मीडिया प्लॅटफॉर्मवर एक पोस्ट शेअर केली. यामध्ये त्यांनी लिहिले की, “व्हाईट हाऊसबाहेर झालेल्या गोळीबाराच्या घटनेत अत्यंत तत्परतेने आणि शौर्याने कारवाई केल्याबद्दल मी गुप्तहेर सेवा (Secret Service) आणि सर्व सुरक्षा पथकांचे आभार मानतो. संशयित हल्लेखोराची पार्श्वभूमी अत्यंत हिंसक होती.” वॉशिंग्टनमधील अलीकडच्या सुरक्षाविषयक घटनांच्या पार्श्वभूमीवर ही तिसरी मोठी घटना असल्याचेही त्यांनी नमूद केले.
नेमकी घटना काय घडली? सिक्रेट सर्व्हिसने दिलेल्या माहितीनुसार, एका २१ वर्षीय तरुणाने व्हाईट हाऊसच्या सुरक्षा चौकीजवळ (१७ वे स्ट्रीट आणि पेनसिल्व्हेनिया एव्हेन्यू) अचानक गोळीबार सुरू केला. तेथे तैनात असलेल्या सुरक्षा अधिकाऱ्यांनी परिस्थितीचे गांभीर्य ओळखून तात्काळ प्रत्युत्तराखल गोळीबार केला. यामध्ये हल्लेखोर गंभीर जखमी झाला. त्याला तातडीने रुग्णालयात दाखल करण्यात आले, मात्र उपचारादरम्यान त्याचा मृत्यू झाला.
एक पादचारी नागरिकही जखमी: या गोळीबाराच्या थरारात तिथे उपस्थित असलेला एक पादचारी नागरिकही जखमी झाला आहे. मात्र, संबंधित नागरिक हल्लेखोराच्या गोळीने जखमी झाला की अधिकार्यांनी स्वसंरक्षणासाठी केलेल्या गोळीबारात, हे अद्याप स्पष्ट झालेले नाही. तपास यंत्रणांकडून या प्रकरणाची सखोल चौकशी केली जात आहे. राष्ट्राध्यक्ष ट्रम्प यांच्या सुरक्षेच्या दृष्टीने गेल्या काही आठवड्यांतील ही तिसरी गोळीबाराची घटना असल्याने अमेरिकेतील सर्वोच्च सुरक्षा यंत्रणा कमालीच्या सतर्क झाल्या आहेत.