पुणे (pragatbharat.com) : मुख्यमंत्री देवेंद्र फडणवीस यांनी राज्याच्या अर्थसंकल्पीय अधिवेशनात जाहीर केलेल्या ‘पुण्यश्लोक अहिल्यादेवी होळकर शेतकरी कर्जमाफी योजना २०२६’ च्या अंमलबजावणीला गती आली आहे. जून २०२६ मध्ये पात्र शेतकऱ्यांच्या खात्यावर कर्जमाफीचा लाभ मिळण्यास सुरुवात होणार आहे. मात्र, या योजनेचा लाभ घेण्यासाठी शेतकऱ्यांना केवायसी (KYC) आणि ‘ॲग्रीस्टॅक’ (Agristack) ॲपवर डिजिटल नोंदणी करणे बंधनकारक करण्यात आले आहे.
२ लाखांपर्यंत कर्जमाफी आणि ५० हजारांचा बोनस: या योजनेअंतर्गत ३० सप्टेंबर २०२५ पर्यंत पीक कर्ज थकीत असलेल्या पात्र शेतकऱ्यांना २ लाख रुपयांपर्यंतची कर्जमाफी दिली जाणार आहे. ज्या शेतकऱ्यांचे कर्ज २ लाखांपेक्षा जास्त आहे, ते वरील रक्कम भरून या योजनेचा लाभ घेऊ शकतात. तसेच, जे शेतकरी नियमितपणे कर्जाची परतफेड करतात, त्यांना प्रोत्साहनपर ५० हजार रुपयांपर्यंतचा बोनस दिला जाणार आहे. पीक कर्ज देणाऱ्या सर्व बँकांमधील पात्र खात्यांना हा लाभ मिळेल.
‘ॲग्रीस्टॅक’ ॲपवर नोंदणी का आवश्यक? भविष्यातील सर्व कृषी योजना, अनुदान आणि या कर्जमाफीचा लाभ थेट मिळवण्यासाठी शासनाने ‘ॲग्रीस्टॅक’ ॲपवर नोंदणी अनिवार्य केली आहे. या ॲपवर शेतकऱ्यांचे नाव, शेतजमीन आणि पिकांचा प्रकार यासारखी संपूर्ण माहिती डिजिटल स्वरूपात जतन केली जात आहे. अनेक जिल्ह्यांमध्ये यासाठी विशेष शिबिरे सुरू असून, ज्यांची नोंदणी नसेल त्यांना योजनेपासून वंचित राहावे लागू शकते.
अशी करा आधार पडताळणी (KYC) प्रक्रिया: १. शेतकऱ्यांनी आपल्या जवळच्या सीएससी (CSC) केंद्रावर किंवा महा-ई-सेवा केंद्रावर जावे. २. सोबत आधार कार्ड, बँक पासबुक आणि आधारशी लिंक असलेला मोबाईल क्रमांक घेऊन जाणे आवश्यक आहे. ३. केंद्रावर शेतकऱ्यांच्या बोटांचे ठसे (Biometric) किंवा मोबाईलवर येणाऱ्या ओटीपी (OTP) द्वारे आधार प्रमाणीकरण यशस्वीरित्या पूर्ण केले जाईल.
कर्जमाफीची प्रक्रिया अंतिम टप्प्यात असल्याने सर्व पात्र शेतकऱ्यांनी वेळेत आपली केवायसी पूर्ण करून घ्यावी, असे आवाहन सहकार विभागाकडून करण्यात आले आहे.