सोलापूर (pragatbharat.com) : आगामी विधानपरिषद निवडणुकीसाठी सोलापूर जिल्ह्यात राजकीय वातावरण चांगलेच तापले आहे. भारतीय जनता पक्षाच्या वाट्याला येणाऱ्या जागांवर वर्णी लागण्यासाठी स्थानिक नेत्यांमध्ये मोठी रस्सीखेच पाहायला मिळत असून, सध्या चार प्रमुख नावांची जोरदार चर्चा रंगली आहे. विशेष म्हणजे, यंदा पक्षाकडून नव्या चेहऱ्यांना आणि महिला उमेदवारांना प्राधान्य दिले जाण्याचे संकेत मिळाल्याने इच्छुकांच्या हालचाली वाढल्या आहेत.
या नावांची लागली आहे वर्णी: सोलापूरमधून भाजपच्या गोटातून धैर्यशील मोहिते-पाटील, मिलन कल्याणशेट्टी, पूजा कोथमिरे आणि अमर पाटील यांच्या नावांची चर्चा वरिष्ठ पातळीवर सुरू आहे. जिल्ह्याचे राजकीय वजन आणि आगामी स्थानिक स्वराज्य संस्थांच्या निवडणुका पाहता, सोलापूरला प्रतिनिधित्व मिळावे असा स्थानिक कार्यकर्त्यांचा आग्रह आहे. यामध्ये महिला आघाडीच्या नेत्यांना संधी देऊन भाजपकडून मोठे ‘राजकीय कार्ड’ खेळले जाण्याची शक्यता वर्तवण्यात येत आहे.
दिल्लीतील निकषांचा प्रभाव: भाजप हायकमांडने आधीच स्पष्ट केले आहे की, पराभूत नेत्यांऐवजी संघटनात्मक कामात सक्रिय असलेल्यांना संधी दिली जाईल. सोलापूर जिल्ह्यात पक्षाची पकड मजबूत करण्यासाठी आणि अंतर्गत बंडाळी रोखण्यासाठी कोणाचे नाव अंतिम होते, याकडे सर्वांचे लक्ष लागले आहे. उमेदवारी मिळवण्यासाठी अनेक इच्छुक नेत्यांनी मुंबई आणि दिल्ली वारी सुरू केली असून वरिष्ठांकडे आपली बाजू मांडण्यात ते व्यग्र आहेत.
नव्या चेहऱ्यांना मिळणार संधी: सूत्रांनी दिलेल्या माहितीनुसार, भाजप यावेळेस निवडून येण्याची क्षमता (Electability) असलेल्या तरुणांना आणि महिलांना संधी देण्याच्या तयारीत आहे. यामुळे प्रस्थापितांना धक्का बसून जिल्ह्यात नवीन नेतृत्व उदयाला येण्याची चिन्हे आहेत. ३० एप्रिल रोजी उमेदवारी अर्ज भरण्याची मुदत संपत असल्याने येत्या दोन दिवसांत चित्र पूर्णपणे स्पष्ट होईल.