खेड/रत्नागिरी (pragatbharat.com) : शिवसेना (ठाकरे गट) नेते आणि आमदार अनिल परब यांच्यासाठी आजचा दिवस अत्यंत दिलासादायक ठरला आहे. बहुचर्चित दापोली येथील साई रिसॉर्ट प्रकरणी खेड येथील अतिरिक्त जिल्हा आणि सत्र न्यायालयाने अनिल परब यांच्यासह सर्व आरोपींची निर्दोष मुक्तता केली आहे. भाजपचे माजी खासदार किरीट सोमय्या यांनी या प्रकरणात परब यांच्यावर गंभीर आरोप केले होते.
न्यायालयाचे महत्त्वाचे निरीक्षण: या प्रकरणाच्या सुनावणीदरम्यान न्यायालयाने अत्यंत महत्त्वाचे निरीक्षण नोंदवले. “जमीन आणि बांधकाम हे दोन स्वतंत्र घटक आहेत,” असे स्पष्ट करत, उपलब्ध पुराव्यांच्या आधारे आरोपींवरील कोणतेही आरोप सिद्ध होत नसल्याचा निष्कर्ष न्यायालयाने काढला. या निकालामुळे गेल्या अनेक दिवसांपासून सुरू असलेल्या राजकीय वादावर तूर्तास पडदा पडला आहे.
काय होते आरोप? किरीट सोमय्या यांनी अनिल परब यांच्यावर दापोलीत साई रिसॉर्ट बांधताना जमीन हडप केल्याचा आणि सीआरझेड (CRZ) नियमांचे उल्लंघन केल्याचा आरोप केला होता. या प्रकरणी अंमलबजावणी संचालनालयाने (ED) देखील तपास केला होता. मात्र, विशेष म्हणजे ईडीने सादर केलेल्या आरोपपत्रात अनिल परब यांच्या नावाचा उल्लेखही नव्हता.
सोमय्यांची प्रतिक्रिया टाळली: न्यायालयाच्या या निर्णयानंतर प्रकरणाचा पाठपुरावा करणारे भाजप नेते किरीट सोमय्या यांनी कोणतीही प्रतिक्रिया देण्याचे टाळले आहे. दुसरीकडे, ठाकरे गटाकडून या निकालाचे स्वागत करण्यात आले असून, हा सत्याचा विजय असल्याची भावना व्यक्त केली जात आहे. या निकालामुळे अनिल परब यांना मोठा कायदेशीर आणि राजकीय दिलासा मिळाला आहे.