नवी दिल्ली (pragatbharat.com) : वैद्यकीय प्रवेशासाठी अत्यंत महत्त्वाची मानली जाणारी NEET (UG) २०२६ ही परीक्षा अखेर रद्द करण्याचा निर्णय नॅशनल टेस्टिंग एजन्सीने (NTA) घेतला आहे. ३ मे रोजी पार पडलेल्या या परीक्षेत पेपरफुटी झाल्याच्या गंभीर आरोपांनंतर विद्यार्थ्यांचे हित आणि परीक्षा पद्धतीवरील विश्वास कायम राखण्यासाठी हा मोठा निर्णय घेण्यात आला आहे.
या प्रकरणाचे गांभीर्य लक्षात घेऊन केंद्र सरकारने या संपूर्ण प्रकरणाची सर्वंकष चौकशी केंद्रीय अन्वेषण विभागाकडे (CBI) सोपवली आहे. तपास यंत्रणांनी दिलेल्या प्राथमिक पुराव्यांच्या आधारे ‘एनटीए’ने हा निर्णय घेतला असून, तपासासाठी सीबीआयला सर्व रेकॉर्ड्स आणि सहकार्य पुरवण्याचे आश्वासन दिले आहे.
ज्या विद्यार्थ्यांनी मे २०२६ च्या सत्रासाठी नोंदणी केली होती, त्यांची उमेदवारी आणि परीक्षा केंद्रे कायम राहतील. ही परीक्षा पुन्हा कधी घेतली जाईल, याची तारीख लवकरच जाहीर केली जाणार आहे. दिलासादायक बाब म्हणजे, फेरपरीक्षेसाठी विद्यार्थ्यांना कोणतीही नवीन नोंदणी करावी लागणार नाही आणि अतिरिक्त परीक्षा शुल्कही भरावे लागणार नाही. या निर्णयामुळे लाखो विद्यार्थ्यांमध्ये चिंतेचे वातावरण असले, तरी पारदर्शकतेसाठी हे पाऊल उचलल्याचे सरकारने स्पष्ट केले आहे.