ठाणे (pragatbharat.com) : ठाणे जिल्हा सत्र न्यायालयाने २०१८ मधील बनावट चलन (Counterfeit Currency) आणि बेकायदेशीर हत्यार बाळगल्याप्रकरणी एका ३८ वर्षीय व्यक्तीला दोषी ठरवले आहे. आरोपीने स्वतः गुन्ह्याची कबुली दिल्यानंतर अतिरिक्त सत्र न्यायाधीश व्ही. एल. भोसले यांनी १७ जून रोजी हा निकाल दिला. आरोपीने आधीच भोगलेला तब्बल ८ वर्षांचा तुरुंगवास आणि त्याची खालावलेली प्रकृती लक्षात घेऊन न्यायालयाने त्याला तात्काळ सोडून देण्याचे आदेश दिले आहेत.
२०१८ मधील पोलीस छाप्याची कारवाई : आशिष शिवकुमार शर्मा असे दोषी ठरलेल्या व्यक्तीचे नाव असून तो ११ जुलै २०१८ पासून न्यायालयीन कोठडीत होता. ठाणे जिल्ह्यातील दिवा परिसरात पोलिसांनी जुलै २०१८ मध्ये टाकलेल्या छाप्यात आशिषच्या ताब्यातून १,०९,६५० रुपये दर्शनी मूल्य असलेल्या बनावट नोटा, नोटा छापण्यासाठी वापरण्यात येणारे स्कॅनर-प्रिंटर आणि एक विनापरवाना बेकायदेशीर बंदूक जप्त करण्यात आली होती. याप्रकरणी पोलिसांनी गुन्हा दाखल करून त्याला अटक केली होती.
‘बनावट नोटा हा देशाच्या अर्थव्यवस्थेवर आघात’ – न्यायालय : निकाल देताना न्यायालयाने बनावट नोटांच्या गुन्ह्याचे गांभीर्य अधोरेखित केले. “बनावट नोटा चलनात आणणे हा एक गंभीर आर्थिक गुन्हा आहे. अशा कृत्यांमुळे देशाची आर्थिक स्थिरता धोक्यात येते आणि सामान्य नागरिकांसह राष्ट्रीय अर्थव्यवस्थेला मोठे नुकसान पोहोचते,” असे निरीक्षण न्यायालयाने नोंदवले.
प्रकृती आणि कौटुंबिक परिस्थितीमुळे दिलासा; सह-आरोपीवर खटला सुरू : गुन्ह्याचे गांभीर्य मोठे असले तरी न्यायालयाने आशिषची खालावलेली प्रकृती, कौटुंबिक पाठींब्याचा अभाव आणि त्याने खटल्यादरम्यान आधीच भोगलेली सुमारे आठ वर्षांची कोठडी विचारात घेतली. न्याय देवतेने दोन्ही बाजूंचा समतोल साधत आशिषला ८,६०० रुपयांचा सामूहिक दंड ठोठावला असून, हा दंड भरल्यानंतर त्याची तात्काळ सुटका करण्याचे आदेश दिले आहेत. दरम्यान, या प्रकरणातील दुसरा सह-आरोपी मोहम्मद इस्माईल यासीन सिद्दीकी याने गुन्ह्याची कबुली दिलेली नसल्याने, त्याच्याविरुद्धचा नियमित खटला स्वतंत्रपणे सुरू राहणार असल्याचे न्यायालयाने स्पष्ट केले आहे.
