पुणे/नागपूर (pragatbharat.com) : देशातील सर्वाधिक लांब पल्ल्याची वंदे भारत ट्रेन म्हणून ओळखल्या जाणाऱ्या पुणे – अजनी (नागपूर) वंदे भारत एक्सप्रेसने प्रवासी वाहतुकीत एक नवा विक्रम प्रस्थापित केला आहे. १० ऑगस्ट २०२५ रोजी सुरू झालेल्या या हाय-स्पीड रेल्वे सेवेने अवघ्या ८ महिन्यांत १.५ लाखांहून अधिक प्रवाशांना त्यांच्या गंतव्यस्थानी पोहोचवले आहे. या प्रचंड प्रतिसादामुळे मध्य रेल्वेच्या (Central Railway) तिजोरीत तब्बल २० कोटी रुपयांहून अधिक महसूल गोळा झाला असून, प्रवाशांची वाढती गर्दी पाहता आता ट्रेनला जादा डबे जोडण्याची मागणी जोर धरू लागली आहे.
खाजगी ट्रॅव्हल्सच्या दरांना चाप; प्रवाशांची पहिली पसंती पश्चिम महाराष्ट्र आणि विदर्भाला जोडणारी ही सेमी-हाय-स्पीड ट्रेन आयटी व्यावसायिक, उद्योजक, नोकरदार आणि विद्यार्थ्यांमध्ये अत्यंत लोकप्रिय झाली आहे. उन्हाळ्याच्या सुट्ट्यांमध्ये या ट्रेनचे बुकिंग तब्बल १४५ टक्क्यांवर पोहोचले असून लांबलचक वेटिंग लिस्ट पाहायला मिळत आहे. सणासुदीच्या आणि सुट्ट्यांच्या काळात खाजगी बसेसचे भाडे २,००० ते ३,००० रुपयांपर्यंत वाढवले जाते, अशा वेळी प्रवाशांसाठी वंदे भारत हा एक जलद, सुरक्षित, आरामदायी आणि परवडणारा उत्तम पर्याय ठरला आहे.
८ डब्यांची ट्रेन; डबे वाढवण्याची प्रवाशांची मागणी अहिल्यानगर (अहमदनगर), मनमाड, भुसावळ आणि अकोला मार्गे धावणारी ही वंदे भारत एक्सप्रेस ८८१ किलोमीटरचे अंतर अवघ्या १२ तासांत पूर्ण करते. सध्या या ट्रेनला १ एक्झिक्युटिव्ह क्लास आणि ७ चेअर कार असे एकूण ८ डबे (Coaches) जोडलेले आहेत. संपूर्ण वातानुकूलित (AC) वातावरण आणि कमी वेळेमुळे ट्रेन हाऊसफुल्ल धावत आहे. प्रवाशांचा वाढता ओघ लक्षात घेता या ८ डब्यांच्या ट्रेनची क्षमता १६ डब्यांपर्यंत वाढवण्यात यावी, जेणेकरून वेटिंग लिस्टवरील प्रवाशांना कन्फर्म तिकीट मिळू शकेल, अशी मागणी प्रवाशांकडून होत आहे. मध्य रेल्वेच्या वरिष्ठ अधिकाऱ्यांनीही आगामी काळात प्रवाशांची संख्या आणखी वाढण्याचा अंदाज व्यक्त केला असून, डबे वाढवण्याबाबत सकारात्मक हालचाली सुरू असल्याचे संकेत दिले आहेत.
