धुळे (pragatbharat.com) :
राज्यभरात इंधन चोरांविरुद्ध सुरू असलेल्या कडक मोहिमेत प्रशासनाला एक फार मोठे यश आले आहे. अन्न, नागरी पुरवठा व ग्राहक संरक्षण विभागाच्या राज्य दक्षता पथकाने (State Vigilance Squad) दोन दिवस गुप्त पाळत ठेवून गुजरात-धुळे हायवेवर चालणारे गॅस आणि डिझेल चोरीचे आंतरराज्य रॅकेट उद्ध्वस्त केले आहे. धुळे जिल्ह्यातील साक्री तालुक्यातील दहीवेल गावाजवळ हायवेवरील धाब्यांच्या मागे सुरू असलेल्या या धडक कारवाईत तब्बल १ कोटी ५६ लाख रुपयांचा अवाढव्य मुद्देमाल जप्त करण्यात आला आहे.
धाब्यांच्या मागे रंगेहात पकडले: हा बेकायदेशीर काळाबाजार सुरत-धुळे महामार्गावर असलेल्या अन्नपूर्णा धाब्याच्या मागे आणि पार्श्वनाथ धाब्याच्या शेजारी सुरू होता. गॅस आणि डिझेलच्या टँकरमधून इंधन चोरून ते इतर वाहनांमध्ये आणि सिलिंडरमध्ये अवैध पद्धतीने भरले जात असल्याची खात्रीशीर माहिती दक्षता पथकाला मिळाली होती. पथकाने सलग दोन दिवस या परिसराची रेकी केली आणि गुरुवारी अचानक धाड टाकली. या कारवाई दरम्यान चोरी करताना तीन आरोपींना रंगेहात अटक करण्यात आली आहे.
टँकर, गाड्या आणि १४० सिलिंडर जप्त: एफडीए आणि दक्षता पथकाने केलेल्या या संयुक्त छाप्यात खालील मुद्देमाल जप्त करण्यात आला आहे:
- गुजरातहून जळगावकडे जाणारा १७.४२ मेट्रिक टन एलपीजी गॅस असलेला भारत पेट्रोलियमचा गॅस टँकर (क्र. GJ-06-AZ-4430).
- ३५ किलोलिटर्स डिझेल वाहून नेणारा एचपी (HP) कंपनीचा डिझेल टँकर (क्र. GJ-12-BZ-7999).
- गॅस रीफिलिंग करण्यासाठी वापरण्यात येणारी एक बोलेरो पिकअप आणि एक छोटा ट्रक.
- १४० कमर्शियल (व्यावसायिक) गॅस सिलिंडर, गॅस भरणे व मोजणी करण्याचे वजनकाटे, नोझल्स आणि डिझेल साठवून ठेवलेले मोठे ड्रम.
दक्षता पथकाची मोठी कामगिरी: इंधन आणि गॅस चोरीची ही गेल्या काही काळातील या भागातील सर्वात मोठी कारवाई मानली जात आहे. ही धाडसी कामगिरी राज्य दक्षता पथकाचे अधिकारी दीपेंद्र पारुळेकर, अमोल बुर्टे, पवन कुंबळे, रवींद्र राठोड, राजेश सोरटे, राहुल इंगळे, देवानंद इंगळे आणि राजीव भेले यांच्या पथकाने केली. आरोपींविरुद्ध जीवनावश्यक वस्तू कायद्यांतर्गत पुढील कडक कायदेशीर कारवाई सुरू करण्यात आली आहे.
