मुंबई (pragatbharat.com) :
दक्षिण मुंबईतील एका नामांकित बँकेत आर्थिक फसवणुकीची एक मोठी आणि धक्कादायक घटना समोर आली आहे. युनियन बँक ऑफ इंडिया (Union Bank of India) च्या भुलेश्वर शाखेतील मुख्य कॅशियरने बँकेच्या तिजोरीतून तब्बल ३२ लाख ३३ हजार ४०१ रुपयांचा अपहार केल्याप्रकर्णी व्ही. पी. रोड पोलिसांनी गुन्हा दाखल केला आहे. बँकेच्या अंतर्गत ऑडिटमध्ये (Internal Audit) तिजोरीतील रोकड कमी असल्याचे उघड झाल्यानंतर हा सर्व प्रकार उघडकीस आला.
संशयित आरोपीची ओळख आणि पार्श्वभूमी: या प्रकरणी गुन्हा दाखल झालेल्या आरोपीचे नाव रवींद्र वसंत सुर्वे (वय ५८ वर्ष) असे आहे. नोव्हेंबर २०२५ पासून तो युनियन बँकेच्या भुलेश्वर शाखेत मुख्य कॅशियर म्हणून कार्यरत होता. त्याच्यावर शाखेतील रोख रक्कम सांभाळणे, दैनंदिन वसुलीची मोजणी करणे आणि ती सुरक्षितपणे मुख्य तिजोरीत (Vault) ठेवण्याची महत्त्वाची जबाबदारी होती. याप्रकरणी भुलेश्वर शाखेचे उपशाखा प्रमुख प्रणय मोहराणा यांनी अधिकृत तक्रार दाखल केली आहे.
पैसे मोजण्यास नकार देऊन कॅशियर पळाला: तक्रारीनुसार, ६ जून रोजी बँकेची वेळ संपल्यानंतर नेहमीच्या प्रक्रियेचा भाग म्हणून उपशाखा प्रमुखांनी रवींद्र सुर्वे याला दिवसाची संपूर्ण रोकड तपासून तिजोरीत ठेवण्यास सांगितले. मात्र, सुर्वे याने रोख रक्कम मोजण्यास स्पष्ट नकार दिला आणि कोणतीही माहिती न देता तो बँकेतून निघून गेला. जाताना त्याने बँकेच्या मुख्य तिजोरीच्या चाव्या देखील स्वतःसोबत नेल्या. दोन दिवसांनंतर म्हणजेच ८ जून रोजी तो बँकेत परत आला, तिजोरीच्या चाव्या उपशाखा प्रमुखांच्या टेबलवर ठेवल्या आणि कर्मचाऱ्यांशी न बोलताच निघून गेला. त्यानंतर त्याचा फोन देखील बंद येत होता.
अंतर्गत ऑडिटमध्ये ३२ लाखांचा फरक: कॅशियरच्या या संशयास्पद वागणुकीमुळे बँकेच्या वरिष्ठ अधिकाऱ्यांनी फोर्ट येथील प्रादेशिक कार्यालयातून येऊन भुलेश्वर शाखेच्या तिजोरीची सखोल तपासणी केली. बँकेच्या अधिकृत रेकॉर्डनुसार, तिजोरीत एकूण ४३,०७,३४६ रुपये असणे आवश्यक होते. मात्र, प्रत्यक्षात मोजणी केली असता तिजोरीत केवळ १०,७३,९४५ रुपये आढळून आले. तपासणीअंती तिजोरीतून तब्बल ३२ लाख ३३ हजार ४०१ रुपये गायब असल्याचे समोर आले.
पोलिसांकडून गुन्हा दाखल, तपास सुरू: या आर्थिक फसवणुकीप्रकरणी व्ही. पी. रोड पोलिसांनी आरोपी रवींद्र सुर्वे याच्याविरुद्ध भारतीय न्याय संहिता (BNS) च्या कलम ३१६(५) अंतर्गत (व्यावसायिक क्षमतेत विश्वासाचा फौजदारी भंग करणे) गुन्हा दाखल केला आहे. पोलीस सध्या बँकेचे रेकॉर्ड, व्यवहार लॉग आणि सीसीटीव्ही (CCTV) फुटेजची कसून तपासणी करत आहेत. हा अपहार नेमका कधी आणि कसा करण्यात आला, याचा शोध पोलीस घेत असून पुढील तपास सुरू आहे.
