पिंपरी (pragatbharat.com) : विद्यार्थ्यांचे आरोग्य, सुरक्षितता आणि शैक्षणिक वातावरण अबाधित ठेवण्यासाठी पिंपरी चिंचवड महानगरपालिकेने एक मोठे पाऊल उचलले आहे. महापालिकेच्या अतिक्रमण निर्मूलन विभागामार्फत शहरातील विविध नामांकित शाळा व महाविद्यालयांच्या परिसरातील अनधिकृत टपऱ्या, पानटपऱ्या आणि बेकायदेशीर अतिक्रमणांवर धडक कारवाईची विशेष मोहीम राबविण्यात आली. या धडक कारवाईमुळे शैक्षणिक संस्थांच्या परिसरात बेकायदेशीर व्यवसाय करणाऱ्यांचे धाबे दणाणले आहेत.
३५ अनधिकृत टपऱ्या जमीनदोस्त; अनेक चालकांची स्वतःहून पळता भुई: महापालिकेच्या पथकाने शहरातील मोरवाडी, आकुर्डी, चिंचवड, जाधववाडी, भोसरी, इंद्रायणीनगर, खराळवाडी, लांडेवाडी, दापोडी, जुनी सांगवी आणि थेरगाव अशा प्रमुख परिसरांमधील शाळा-महाविद्यालयांच्या १०० मीटर परिघातील अनधिकृत टपऱ्यांची कसून पाहणी केली. या मोहिमेदरम्यान थेट कारवाई करत एकूण ३५ अनधिकृत टपऱ्या जप्त करून हटविण्यात आल्या. महापालिकेचा कडक बडगा आणि कारवाईची पूर्वसूचना मिळताच अनेक टपरीधारकांनी स्वतःहून आपली अतिक्रमणे काढून घेत तिथून पळ काढला.
तंबाखूमुक्त वातावरण निर्मितीसाठी महाराष्ट्र शासनाचे निर्देश: सदर कारवाई ही केवळ अतिक्रमण हटवण्यापुरती मर्यादित नसून विद्यार्थ्यांचे आरोग्य आणि व्यसनाधीनतेपासून त्यांचे रक्षण करण्यासाठी अत्यंत महत्त्वाची मानली जात आहे. महाराष्ट्र शासनाने शासकीय, निमशासकीय शाळा तसेच सार्वजनिक ठिकाणे तंबाखूमुक्त (Tobacco-Free Zone) ठेवण्याबाबत वेळोवेळी कडक निर्देश जारी केले आहेत. या नियमांचे उल्लंघन करणाऱ्या आणि विद्यार्थ्यांच्या हिताला बाधा पोहोचवणाऱ्या घटकांवर यापुढेही नियमितपणे वॉच ठेवला जाईल, असे पालिकेने स्पष्ट केले आहे.
विद्यार्थ्यांच्या हिताशी तडजोड नाही – आयुक्त डॉ. विजय सूर्यवंशी: पिंपरी चिंचवड महानगरपालिकेचे आयुक्त तथा प्रधान जनगणना अधिकारी डॉ. विजय सूर्यवंशी यांनी या कारवाईबाबत भूमिका स्पष्ट करताना सांगितले की, “विद्यार्थ्यांचे सुरक्षित, शिस्तबद्ध आणि सकारात्मक शैक्षणिक वातावरण राखणे ही महापालिकेची सर्वोच्च प्राथमिकता आहे. शाळा व महाविद्यालय परिसरातील अनधिकृत टपऱ्या आणि अतिक्रमणे हटविण्यासाठी ही विशेष मोहीम राबविण्यात आली असून, अशी कारवाई यापुढेही कोणत्याही दबावाला बळी न पडता सातत्याने सुरूच राहील. विद्यार्थ्यांच्या हिताशी आणि भविष्याशी कोणतीही तडजोड केली जाणार नाही, यासाठी सर्व संबंधित विभागांना कठोर सूचना देण्यात आल्या आहेत.”
