मुंबई/ठाणे (pragatbharat.com) : मुंबई ते नागपूर प्रवास करणाऱ्या प्रवाशांसाठी एक अत्यंत दिलासादायक बातमी समोर आली आहे. समृद्धी महामार्गावर प्रवेश करताना होणारी वाहतूक कोंडी फोडण्यासाठी आता एक नवीन उन्नत मार्ग (Elevated Road) उभारला जाणार आहे. या प्रकल्पामुळे ठाणे आणि मुंबईकरांना कमी वेळेत नागपूरकडे कूच करणे शक्य होणार आहे.
सध्या समृद्धी महामार्गावरून प्रवास सुसाट होत असला, तरी ठाण्यातील वाडपे इंटरचेंज परिसरात प्रवाशांना दररोज भीषण वाहतूक कोंडीचा सामना करावा लागतो. ही समस्या कायमची सोडवण्यासाठी सरकारने साकेत ते आमणे दरम्यान २१.३ किमी लांबीचा नवीन मार्ग प्रस्तावित केला आहे. या प्रकल्पातील विशेष बाब म्हणजे, एकूण लांबीपैकी १२.५५ किमी भाग हा उन्नत (एलिव्हेटेड) रस्ता असेल, तर उर्वरित मार्ग सामान्य असेल.
हा नवीन मार्ग ६ पदरी असणार असून, यामुळे वाडपे इंटरचेंजवरील वाहनांचा भार मोठ्या प्रमाणात हलका होणार आहे. साकेत येथून सुरू होणारा हा मार्ग थेट आमणे येथे समृद्धी महामार्गाला जोडला जाईल. या प्रकल्पामुळे मुंबईहून नागपूरकडे जाणाऱ्या अवजड आणि खाजगी वाहनांची ये-जा अत्यंत सुरळीत होईल. या महत्त्वाकांक्षी प्रकल्पामुळे प्रवाशांच्या इंधनाची आणि वेळेची मोठी बचत होणार असून, समृद्धी महामार्गाचा प्रवास खऱ्या अर्थाने अडथळामुक्त होणार आहे.
