मुंबई (pragatbharat.com) : राष्ट्रवादी काँग्रेस पक्षाच्या (अजित पवार गट) नवीन राष्ट्रीय कार्यकारिणीवरून सध्या राजकीय वर्तुळात मोठा गोंधळ निर्माण झाला आहे. केंद्रीय निवडणूक आयोगाला सादर करण्यात आलेली एक यादी सोशल मीडियावर व्हायरल झाली असून, त्यामध्ये प्रफुल्ल पटेल, छगन भुजबळ आणि सुनील तटकरे यांसारख्या दिग्गज नेत्यांची नावे नसल्याने सर्वांच्या भुवया उंचावल्या आहेत. मात्र, या प्रकरणावर आता पक्षाच्या राष्ट्रीय अध्यक्षा सुनेत्रा पवार यांनी अधिकृत स्पष्टीकरण दिले आहे.
प्रसारमाध्यमांमध्ये व्हायरल होत असलेल्या २९ एप्रिलच्या पत्रात सुनेत्रा पवार यांचे नाव राष्ट्रीय अध्यक्ष म्हणून, तर पार्थ पवार आणि जय पवार यांची नावे जनरल सेक्रेटरी म्हणून दिसत आहेत. आश्चर्याची बाब म्हणजे, पक्षाचे मुख्य आधारस्तंभ मानले जाणारे प्रफुल्ल पटेल आणि सुनील तटकरे यांची नावे या कार्यकारिणीतून वगळण्यात आल्याचे या पत्रात दिसून आले. यामुळे पक्षात अंतर्गत फेरबदल झाले की काय, अशी चर्चा रंगली होती.
यावर प्रतिक्रिया देताना सुनेत्रा पवार यांनी ‘एक्स’ (ट्विटर) पोस्टद्वारे स्पष्ट केले की, “प्रसारित होत असलेल्या यादीमध्ये काही तांत्रिक आणि क्लेरिकल (लेखाविषयक) चुका झाल्या आहेत. ही चूक लवकरच दुरुस्त केली जाईल.” या स्पष्टीकरणामुळे तूर्तास चर्चांना पूर्णविराम मिळाला असला, तरी या तांत्रिक चुकीमुळे पक्षाच्या प्रशासकीय कामावर प्रश्नचिन्ह उपस्थित केले जात आहे. दुसरीकडे, बारामतीमध्ये युगेंद्र पवार आणि जय पवार यांच्या वाढत्या सक्रियतेमुळे आगामी काळात राजकीय संघर्षाची धार अधिक तीव्र होण्याची शक्यता आहे.