नवी दिल्ली (pragatbharat.com) : भारताचे जागतिक स्थान अधिक बळकट करण्यासाठी व्यापार, तंत्रज्ञान आणि धोरणात्मक भागीदारी वाढवण्यासोबतच परदेशातील भारतीय समुदायाशी (Diaspora) संबंध अधिक दृढ करण्याचे आवाहन पंतप्रधान नरेन्द्र मोदी यांनी केले आहे. नवी दिल्ली येथे २८ ते ३० एप्रिल दरम्यान परराष्ट्र मंत्रालयाद्वारे आयोजित ‘११ व्या मिशन प्रमुखांच्या परिषदेत’ (Heads of Missions Conference) ते बोलत होते.
२०४७ च्या मुत्सद्देगिरीवर भर: यावर्षीच्या परिषदेची मुख्य संकल्पना “२०४७ साठी भारतीय मुत्सद्देगिरीत सुधारणा” (Reforming Indian Diplomacy for 2047) ही होती. २०४७ पर्यंत ‘विकसित भारत’ हे ध्येय साध्य करण्यासाठी भारतीय मुत्सद्दींनी कशा प्रकारे काम करावे, यावर पंतप्रधानांनी मार्गदर्शन केले. यावेळी त्यांनी ३-टी (व्यापार-Trade, तंत्रज्ञान-Technology आणि पर्यटन-Tourism) या त्रिसूत्रीचा प्रसार करण्यावर आणि जागतिक स्तरावर ‘भारत गाथा’ (Bharat Story) प्रभावीपणे मांडण्यावर भर दिला.
भारतीय मुत्सद्देगिरी सज्ज – एस. जयशंकर: परराष्ट्र मंत्री एस. जयशंकर यांनी २९ एप्रिल रोजी या परिषदेचे उद्घाटन केले. ते म्हणाले की, गेल्या दशकात भारताच्या जागतिक सहभागाचा लक्षणीय विस्तार झाला आहे. सध्याच्या अस्थिर जागतिक परिस्थितीत राष्ट्रीय हितसंबंध जोपासण्यासाठी आणि राष्ट्रीय उद्दिष्टे सुरक्षित करण्यासाठी भारतीय मुत्सद्देगिरी पूर्णपणे सज्ज आहे.
तीन दिवस चाललेल्या या परिषदेत विविध देशांतील भारतीय राजदूतांनी योगासने, ब्रेनस्टॉर्मिंग सेशन्स आणि भू-राजकीय घडामोडींवर सखोल चर्चा केली. भविष्यातील आव्हानांना तोंड देण्यासाठी भारतीय दूतावासांना अधिक सक्षम आणि ‘फ्युचर रेडी’ करण्यावर या परिषदेत एकमत झाले.