बुलढाणा/मुंबई (pragatbharat.com) : शिवसेनेचे (शिंदे गट) आमदार संजय गायकवाड यांनी प्रसिद्ध लेखक गोविंद पानसरे यांच्या ‘शिवाजी कोण होता?’ या पुस्तकाबाबत केलेल्या वादग्रस्त विधानांचा आणि कथित गुंडगिरीचा पूर्णपणे उलटा परिणाम पाहायला मिळत आहे. या वादाच्या पार्श्वभूमीवर, वाचकांमध्ये या पुस्तकाविषयी प्रचंड उत्सुकता निर्माण झाली असून, अवघ्या ४ दिवसांत १० हजार प्रतींची विक्री झाली आहे. मागणी इतकी वाढली आहे की, प्रकाशकांना या पुस्तकाची छपाई पुन्हा सुरू करावी लागली आहे.
काही दिवसांपूर्वी आमदार संजय गायकवाड यांनी या पुस्तकातील मजकुरावर आक्षेप घेत आक्रमक भूमिका घेतली होती. मात्र, या विरोधाचा सकारात्मक परिणाम पुस्तकाच्या लोकप्रियतेवर झाला आहे. महाराष्ट्रातील विविध पुस्तक डेपो आणि ऑनलाईन प्लॅटफॉर्मवर हे पुस्तक सध्या ‘आऊट ऑफ स्टॉक’ झाले आहे. सामान्य वाचक आणि तरुण वर्ग छत्रपती शिवाजी महाराज यांचा खरा इतिहास काय आहे, हे जाणून घेण्यासाठी पानसरे यांच्या या पुस्तकाकडे वळले आहेत.
पुरोगामी संघटना आणि साहित्यिक वर्तुळातून या विक्रीचे स्वागत होत आहे. “एखाद्या विचाराला दाबायचा प्रयत्न केला की तो अधिक वेगाने पसरतो,” अशी प्रतिक्रिया लेखक आणि इतिहासकारांनी व्यक्त केली आहे. कोल्हापूरच्या लोकवाङ्मय गृह या प्रकाशनाने या पुस्तकाच्या नवीन आवृत्तीचे काम युद्धपातळीवर सुरू केले आहे. राजकीय वादातून सुरू झालेला हा विषय आता वैचारिक चळवळीचे रूप घेत असल्याचे चित्र महाराष्ट्रात दिसत आहे.