नवी दिल्ली (pragatbharat.com) : भारत आणि सायप्रस यांच्यातील द्विपक्षीय संबंधांना अधिक बळकटी देण्यासाठी आज नवी दिल्लीत एक महत्त्वपूर्ण पाऊल टाकण्यात आले. भारताचे पंतप्रधान नरेंद्र मोदी आणि सायप्रसचे राष्ट्रपती निकोस क्रिस्टोडौलाइड्स यांच्यात आज नवी दिल्ली येथे विविध क्षेत्रांतील सहकार्य वाढवण्याबाबत सविस्तर चर्चा झाली. या उच्चस्तरीय बैठकीत दोन्ही देशांनी दहशतवादविरोधी संयुक्त कार्य गट (Joint Working Group) स्थापन करण्यासह अनेक महत्त्वाच्या करारांवर स्वाक्षऱ्या केल्या.
दोन्ही देशांमध्ये झालेली ही चर्चा अत्यंत सकारात्मक आणि भविष्याभिमुख राहिली. यामध्ये दहशतवादविरोधी लढा, नवोन्मेष आणि तंत्रज्ञान (Innovation & Technology), उच्च शिक्षण आणि संशोधन, तसेच सांस्कृतिक सहकार्य या क्षेत्रांचा प्रामुख्याने समावेश आहे. याशिवाय, दोन्ही नेत्यांनी प्रादेशिक आणि जागतिक महत्त्वाच्या मुद्द्यांवर आणि बहुपक्षीय मंचांवरील सहकार्याबाबतही आपले विचार मांडले.
गुंतवणूक दुप्पट करण्याचे उद्दिष्ट: संयुक्त निवेदनात पंतप्रधान नरेंद्र मोदी म्हणाले की, भारत आणि सायप्रसची मैत्री केवळ दृढ नसून ती भविष्यकालीन गरजांवर आधारित आहे. गेल्या दशकात सायप्रसकडून भारतात होणारी गुंतवणूक जवळपास दुप्पट झाली आहे. भारत आणि युरोपीय युनियन (EU) दरम्यान होत असलेल्या मुक्त व्यापार करारामुळे (FTA) दोन्ही देशांमधील व्यावसायिक विश्वास वाढला असून नव्या संधी निर्माण झाल्या आहेत. पुढील पाच वर्षांत हा गुंतवणूक प्रवाह पुन्हा दुप्पट करण्याचे उद्दिष्ट दोन्ही देशांनी ठेवले असल्याचे पंतप्रधान मोदी यांनी स्पष्ट केले.
सायप्रसचे राष्ट्रपती निकोस क्रिस्टोडौलाइड्स यांनीही गेल्या वर्षभरात भारत-सायप्रस आणि युरोपीय युनियन-भारत यांच्यातील संबंधांमध्ये मोठी प्रगती झाल्याबद्दल समाधान व्यक्त केले. राष्ट्रपती क्रिस्टोडौलाइड्स हे चार दिवसांच्या भारत दौऱ्यावर आले असून, आज संध्याकाळी ते राष्ट्रपती भवनात राष्ट्रपती द्रौपदी मुर्मू यांची भेट घेणार आहेत. तत्पूर्वी, आज सकाळी भारताचे परराष्ट्र मंत्री डॉ. एस. जयशंकर यांनीही सायप्रसच्या राष्ट्रपतींची भेट घेऊन द्विपक्षीय आणि धोरणात्मक संबंध अधिक दृढ करण्यावर चर्चा केली.