नवी दिल्ली/बेंगळुरू (pragatbharat.com) : आफ्रिकेतील काही भागांमध्ये ‘इबोला’ व्हायरसचा (Ebola Virus Disease) प्रादुर्भाव वेगाने वाढत असल्याच्या पार्श्वभूमीवर केंद्र सरकारने भारतात कोणती परिस्थिती आहे, याबाबत मोठा खुलासा केला आहे. “भारतात अद्याप इबोला व्हायरसचा एकही रुग्ण आढळलेला नाही,” असे केंद्रीय आरोग्य मंत्रालयाने (Union Health Ministry) स्पष्ट केले आहे. मात्र, जागतिक परिस्थिती पाहता केंद्र सरकार आणि आरोग्य मंत्रालय या संपूर्ण घडामोडींवर अत्यंत बारीक लक्ष ठेवून आहे.
नुकतीच युगांडा येथून प्रवास करून बेंगळुरूमध्ये परतलेल्या एका व्यक्तीमध्ये अंगदुखीसारखी सौम्य लक्षणे दिसून आली होती. त्यानंतर खबरदारीचा उपाय म्हणून त्याला बेंगळुरूमधील शासकीय संसर्गजन्य रोग रुग्णालयात (Epidemic Diseases Hospital) निरीक्षणाखाली ठेवण्यात आले होते. या रुग्णाचे नमुने गोळा करून तातडीने पुणे येथील ‘नॅशनल इन्स्टिट्यूट ऑफ व्हायरोलॉजी’ (NIV) कडे प्रयोगशाळा चाचणीसाठी पाठवण्यात आले होते. सुदैवाने, या चाचणीचा अहवाल पूर्णपणे ‘नेगेटिव्ह’ आला असून नागरिकांना मोठा दिलासा मिळाला आहे.
विमानतळांवर कडक स्क्रिनिंग आणि देखरेख: केंद्रीय आरोग्य मंत्रालय राज्य प्रशासनाच्या समन्वयाने जागतिक आरोग्य संघटनेच्या (WHO) मार्गदर्शक तत्त्वांनुसार देशभरात कडक पाळत ठेवून आहे. देशातील सर्व आंतरराष्ट्रीय विमानतळे आणि बंदरांवर (Designated Points of Entry) परदेशातून येणाऱ्या प्रवाशांचे कडक स्क्रिनिंग आणि थर्मल स्कॅनिंग केले जात आहे. सार्वजनिक आरोग्य यंत्रणा कोणत्याही परिस्थितीचा सामना करण्यासाठी पूर्णपणे सज्ज आणि सतर्क आहे, अशी ग्वाही मंत्रालयाने दिली आहे. तसेच, नागरिकांनी कोणत्याही अफवांवर विश्वास ठेवू नये, सोशल मीडियावर चुकीची माहिती पसरवू नये आणि केवळ अधिकृत सरकारी स्रोतांकडून मिळणाऱ्या माहितीवरच विश्वास ठेवावा, असे आवाहनही केंद्र सरकारने केले आहे.
