सोलापूर (pragatbharat.com) : महाराष्ट्राच्या राजकीय पटलावर पुन्हा एकदा मुख्यमंत्रीपदावरून दावे-प्रतिदावे सुरू झाले असून, विशेषतः महायुतीमध्ये या विषयावरून अंतर्गत धुसफूस चव्हाट्यावर आली आहे. आगामी निवडणुकांच्या पार्श्वभूमीवर प्रत्येक पक्षाकडून आपल्या नेत्याला मुख्यमंत्री म्हणून प्रोजेक्ट करण्याची चढाओढ सुरू झाल्याचे चित्र दिसत आहे.
या वादाचे मुख्य केंद्र ठरले आहे ते म्हणजे जय पवार यांनी केलेले वक्तव्य. बारामतीमध्ये काल (७ मे २०२६) ‘जनता दरबार’ आयोजित केल्यानंतर प्रसारमाध्यमांशी बोलताना उपमुख्यमंत्री अजित पवार यांचे चिरंजीव जय पवार यांनी एक मोठी इच्छा व्यक्त केली. “सर्वच बारामतीकरांना अजितदादांना मुख्यमंत्री म्हणून बघायचे होते. आता सुनेत्रा पवार देखील तसे कष्ट घेत आहेत. त्यामुळे २०२९ च्या निवडणुकीनंतर सुनेत्रा वहिनी राज्याच्या मुख्यमंत्री व्हाव्यात, अशी आम्हा सर्वांची आशा आहे,” असे विधान जय पवार यांनी केले. त्यांच्या या विधानामुळे महायुतीतील घटक पक्षांमध्ये खळबळ उडाली आहे.
जय पवार यांच्या या दाव्याला भाजप आणि शिवसेना (शिंदे गट) या दोन्ही पक्षांकडून तात्काळ प्रत्युत्तर देण्यात आले आहे. सोलापूरमध्ये पत्रकारांशी बोलताना भाजपचे नेते तथा ग्रामविकास मंत्री जयकुमार गोरे यांनी जय पवारांना सणसणीत टोला लगावला. गोरे म्हणाले, “मुख्यमंत्री होण्यासाठी खूप मोठा जनाधार लागतो, आमदारांचे संख्याबळ आणि राजकीय पाठिंबा लागतो. २०२९ मध्ये देवेंद्र फडणवीस हेच महाराष्ट्राचे मुख्यमंत्री असतील, यात शंका नाही.”
दुसरीकडे, शिवसेनेचे प्रवक्ते आणि मंत्री भरत गोगावले यांनीही जय पवारांच्या विधानाची फिरकी घेतली. “सुनेत्रा पवार चांगल्या मताधिक्याने निवडून आल्यामुळे जय पवारांना कदाचित पुढची स्वप्ने पडू लागली असावीत. कोणालाही आपली इच्छा व्यक्त करण्यापासून रोखता येत नाही, पण स्वप्न पाहणे आणि वास्तव यात फरक असतो,” असे गोगावले यांनी नमूद केले.
या वादात आता विरोधी पक्षानेही उडी घेतली आहे. राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी महायुतीवर निशाणा साधताना म्हटले की, “महाराष्ट्रात भाजपसोबत राहून दुसऱ्या कोणत्याही पक्षाचा मुख्यमंत्री होऊ शकत नाही. जर कोणाला मुख्यमंत्री व्हायचे असेल, तर त्यांना भाजपला विरोध करावाच लागेल.”
एकूणच, २०२९ च्या मुख्यमंत्रीपदाचा विषय आतापासूनच चर्चेत आल्याने महायुतीमधील समन्वय आणि जागावाटपाच्या गणितांवर याचे काय परिणाम होतात, याकडे राजकीय विश्लेषकांचे लक्ष लागले आहे.