न्यूयॉर्क (pragatbharat.com) : अब्जाधीश उद्योजक एलन मस्क (Elon Musk) यांची इलेक्ट्रिक कार कंपनी टेस्ला (Tesla) भारतात गुंतवणूक करणार अशी चर्चा गेल्या अनेक महिन्यांपासून सुरू होती. मात्र, आता मस्क यांनी भारताऐवजी चीनमधील शांघाय येथील आपल्या कारखान्याचा विस्तार करण्याला प्राधान्य दिल्याचे वृत्त समोर आले आहे. भारताने आयात शुल्कात सवलत देण्यास नकार दिल्याने मस्क यांनी हा निर्णय घेतल्याचे बोलले जात आहे.
वादाचे मुख्य कारण: भारत सरकारने टेस्लाला स्पष्ट शब्दांत सांगितले होते की, जर त्यांना भारतात कार विकायच्या असतील, तर त्यांचे उत्पादनही भारतातच (Make in India) करावे लागेल. चीनमध्ये बनवलेल्या कार भारतात विकण्यास सरकारने कडक विरोध केला होता. दुसरीकडे, मस्क यांना सुरुवातीला काही काळ कमी शुल्कात कार आयात करून भारतीय बाजारपेठेचा अंदाज घ्यायचा होता. या अटींवर एकमत न झाल्याने टेस्लाने तूर्तास आपला भारत दौरा रद्द केल्याचे समजते.
चीनमधील विस्तार: टेस्ला आता शांघायमध्ये आपली नवीन ‘मेगापॅक’ बॅटरी फॅक्टरी उभारणार आहे. भारतासाठी हा मोठा आर्थिक धक्का मानला जात आहे, कारण यामुळे हजारो रोजगाराच्या संधी निर्माण होणार होत्या. मात्र, भारत सरकारने ‘स्वदेशी’ उत्पादनावर ठाम राहून आपली भूमिका स्पष्ट केली आहे.