न्यू यॉर्क/मुंबई (pragatbharat.com) : संयुक्त राष्ट्रांच्या (UN) महासभेने जाहीर केल्यानुसार दरवर्षी १६ जून हा दिवस जगभरात ‘आंतरराष्ट्रीय कौटुंबिक प्रेषण दिवस’ (International Day of Family Remittances – IDFR) म्हणून साजरा केला जातो. परदेशात राहून अहोरात्र कष्ट करणारे आणि आपल्या मायदेशातील कुटुंबाला आर्थिक मदत (Remittances) पाठवणाऱ्या जगभरातील २० कोटींहून अधिक स्थलांतरित कामगारांच्या (Migrant Workers) त्यागाचा आणि योगदानाचा गौरव करण्यासाठी हा विशेष दिवस समर्पित आहे.
या दिवसाच्या माध्यमातून संयुक्त राष्ट्र स्थलांतरित कामगारांचे त्यांच्या कुटुंबावरील प्रेम आणि त्यांच्या मूळ देशाच्या आर्थिक विकासातील, गरिबी निर्मूलनातील तसेच शिक्षणातील महत्त्वपूर्ण योगदान जगासमोर आणते.
आर्थिक प्रेषणात (Remittances) भारत जगात अव्वल: जागतिक बँकेच्या (World Bank) अहवालानुसार, परदेशातून आपल्या देशात पैसे पाठवण्याच्या बाबतीत भारत हा संपूर्ण जगात सलग अनेक वर्षांपासून पहिल्या क्रमांकावर आहे. आखाती देश (Gulf Countries), अमेरिका, ब्रिटन आणि युरोपमध्ये स्थायिक झालेल्या कोट्यवधी भारतीयांनी (Non-Resident Indians – NRI) भारताच्या अर्थव्यवस्थेला नेहमीच मोठा परकीय चलनाबाबात आधार दिला आहे. भारताला दरवर्षी साधारणतः १०० अब्ज डॉलर्सपेक्षा जास्त रक्कम प्रेषणाच्या माध्यमातून मिळते, जी देशाच्या परकीय चलन साठ्यासाठी अत्यंत महत्त्वाची ठरते.
शाश्वत विकासाचे ध्येय (SDG): संयुक्त राष्ट्रांच्या मते, स्थलांतरित कामगारांनी पाठवलेला पैसा हा थेट ग्रामीण आणि निमशहरी भागातील कुटुंबांपर्यंत पोहोचतो. यामुळे अन्न, आरोग्य, उत्तम शिक्षण आणि गृहनिर्माण या मूलभूत गरजा पूर्ण होतात. ‘ज्ञान आणि डिजिटल तंत्रज्ञानाचा वापर करून पैशांच्या देवाणघेवाणीचा खर्च कमी करणे’ हे या मोहिमेचे मुख्य उद्दिष्ट आहे, जेणेकरून कष्टकऱ्यांच्या पैशांची जास्तीत जास्त बचत होईल. या निमित्ताने जगभरात विविध जनजागृती उपक्रम राबविले जात आहेत.
