मुंबई (pragatbharat.com) : गेल्या काही दिवसांपासून राष्ट्रवादी काँग्रेस पक्षांतर्गत सर्व काही आलबेल नसल्याच्या आणि वरिष्ठ नेत्यांमध्ये मोठे मतभेद असल्याच्या चर्चा राजकीय वर्तुळात रंगल्या आहेत. राष्ट्रवादीने निवडणूक आयोगाला दिलेल्या एका पत्रानंतर पक्षाचे प्रदेशाध्यक्ष सुनील तटकरे आणि ज्येष्ठ नेते प्रफुल्ल पटेल यांच्या पदांबाबत अनेक प्रश्नचिन्ह उपस्थित केले जात होते. या पार्श्वभूमीवर, राष्ट्रवादी काँग्रेसचे प्रवक्ते उमेश पाटील आणि राष्ट्रीय सचिव अविनाश आदिक यांनी आज एक तातडीची पत्रकार परिषद घेत सर्व चर्चांना पूर्णविराम दिला आहे, तसेच आमदार रोहित पवार यांच्यावर अत्यंत गंभीर आरोप केले आहेत.
सुनील तटकरे आणि प्रफुल्ल पटेल यांच्या पदांबाबत मोठे स्पष्टीकरण: पत्रकार परिषदेत बोलताना उमेश पाटील यांनी पक्षातील पदांबाबत सुरू असलेल्या अफवा फेटाळून लावल्या. ते म्हणाले, “सुनील तटकरे हेच राष्ट्रवादी काँग्रेस पक्षाचे प्रदेशाध्यक्ष आहेत आणि तेच पुढेही राहणार आहेत. तसेच प्रफुल्ल पटेल हे पक्षाचे कार्याध्यक्ष आहेत आणि ते कायम राहतील. पक्षाची राष्ट्रीय कमिटी नुकतीच जाहीर झाली असून, पक्षात कोणतेही फेरबदल करायचे असल्यास त्याचा अंतिम निर्णय केवळ राष्ट्रीय कमिटीच घेईल. त्यामुळे माध्यमांनी चुकीच्या बातम्यांवर विश्वास ठेवू नये.”
दिल्ली पक्ष कार्यालयात प्रवेशबंदीच्या वृत्तावर कायदेशीर कारवाईचा इशारा: पक्षाचे राष्ट्रीय सचिव अविनाश आदिक यांनी दिल्ली येथील पक्ष कार्यालयाच्या वादावर स्पष्टीकरण दिले. ते म्हणाले, “मी गेल्या अनेक महिन्यांपासून दिल्लीतील पक्ष कार्यालयाचे काम सांभाळत आहे. मात्र, काही घटकांनी जाणीवपूर्वक माझ्या नावाने वृत्तपत्रांमध्ये खोटी बातमी पसरवली की, मी प्रफुल्ल पटेल आणि सुनील तटकरे यांना दिल्ली कार्यालयात येण्यास बंदी घातली आहे. हा निव्वळ खोडसाळपणा असून, आमच्यात कोणतेही मतभेद नाहीत. ज्या वृत्तपत्राने ही निराधार बातमी छापली आहे, त्यांच्या विरोधात आम्ही कायदेशीर सल्ला घेऊन अब्रूनुकसानीचा दावा ठोकणार आहोत.”
रोहित पवारांवर गंभीर आरोप – ‘अजित पवारांची लीगसी खेचण्याचा प्रयत्न’: या पत्रकार परिषदेत शरद पवार गटाचे आमदार रोहित पवार यांच्यावर राष्ट्रवादीकडून जोरदार हल्लाबोल करण्यात आला. उमेश पाटील यांनी आरोप केला की, “रोहित पवार हे सातत्याने अजित पवार यांचा राजकीय छळ करण्याचा प्रयत्न करत आहेत. त्यांचा खरा डोळा बारामतीवर आहे, जी अजितदादांची राजकीय राजधानी मानली जाते. अजित पवारांच्या विमान अपघाताच्या चौकशीवरून रोहित पवार विनाकारण ढोल बडवत असून, अजितदादांची राजकीय लीगसी (वारसा) हिरावून घेण्याचा त्यांचा डाव आहे.”
पुढे बोलताना त्यांनी दावा केला की, “रोहित पवारांनी आमच्या पक्षाची काळजी करू नये. उलट त्यांच्याच पक्षातील अनेक आमदार आणि खासदार आमच्या संपर्कात असून ते पक्षात येण्यास उत्सुक आहेत, मात्र आम्ही अद्याप त्यावर कोणताही निर्णय घेतलेला नाही.”
