पालघर (pragatbharat.com) : जिल्ह्यातील एका २३ वर्षीय आदिवासी मजूराला पैशांचे आमिष दाखवून वेठबिगार (Bonded Labour) म्हणून काम करण्यास भाग पाडल्याची धक्कादायक घटना समोर आली आहे. याप्रकरणी कातकरी समाजातील पीडित मजूराच्या तक्रारीवरून पालघर पोलिसांनी संबंधित वीटभट्टी मालकावर ‘भारतीय न्याय संहिता’ (BNS) आणि ‘वेठबिगारी पद्धत (निर्मूलन) कायदा’ अंतर्गत गुन्हा दाखल केला आहे.
अडचणीचा फायदा घेऊन छळ: पोलीस सूत्रांनी दिलेल्या माहितीनुसार, पीडित मजूराने ऑक्टोबर २०२५ मध्ये वीटभट्टीवर काम सुरू केले होते. त्यासाठी त्याने २०,००० रुपये ॲडव्हान्स आणि त्यानंतर टप्प्याटप्प्याने ४०,००0 रुपये घेतले होते. दरम्यानच्या काळात, या मजूराला शासकीय घरकुल योजनेअंतर्गत हक्काचे घर मंजूर झाले. घराचे बांधकाम सुरू करण्यासाठी त्याने मालकाकडे गावाकडे जाण्याची परवानगी मागितली. मात्र, वीटभट्टी मालकाने त्याला गावाकडे जाण्यास नकार देत, धमकावून फेब्रुवारी २०२६ पर्यंत जबरदस्तीने काम करण्यास भाग पाडले.
श्रमजीवी संघटनेचा यशस्वी पाठपुरावा: मालकाच्या जाचाला कंटाळलेल्या मजूराने अखेर श्रमजीवी संघटनेकडे धाव घेतली. संघटनेच्या कार्यकर्त्यांनी या प्रकरणाचे गांभीर्य ओळखून तात्काळ प्रशासकीय आणि पोलीस पातळीवर पाठपुरावा केला. मजूराला बेकायदेशीरपणे डांबून ठेवणे, गुन्हेगारी स्वरूपाची धमकी देणे आणि जाणीवपूर्वक अपमान करणे या कलमांखाली वीटभट्टी मालकावर पालघर पोलिसांनी गुन्हा नोंदवला असून, पुढील तपास सुरू आहे.
ठाण्यात बसमधील महिला चोरट्यांकडून ३७ लाखांचे सोने जप्त दुसऱ्या एका कारवाईत, ठाणे क्राईम ब्रांचने बसमधील गर्दीचा फायदा घेऊन वृद्ध प्रवाशांचे दागिने चोरणाऱ्या दोन महिलांना (संगीता पिठकर, वय ४५ आणि सुरेखा गायकवाड, वय ४७, रा. मुलुंड) अटक केली आहे. त्यांच्या अटकेमुळे चोरीचे तब्बल ९ गुन्हे उघडकीस आले असून, त्यांच्याकडून ३७.१९ लाख रुपयांचे सोन्याचे दागिने हस्तगत करण्यात आले आहेत.