नागपूर (pragatbharat.com) : मराठी रंगभूमी आणि चित्रपटसृष्टीच्या इतिहासात मैलाचा दगड ठरलेल्या ‘नटसम्राट’ या कलाकृतीबाबत ज्येष्ठ अभिनेते नाना पाटेकर यांनी एक अत्यंत धक्कादायक आणि खळबळजनक खुलासा केला आहे. “ज्यांनी ज्यांनी नटसम्राट नाटक केलं, ते सगळे हार्ट अटॅकने गेले, मीसुद्धा गेलो असतो…” असे थेट आणि मनमोकळे विधान नाना पाटेकर यांनी केले आहे. नागपूर येथे पार पडलेल्या एका जाहीर परिषदेत त्यांनी ‘नटसम्राट’ नाटक नाकारून केवळ चित्रपट का केला, यामागचा पडद्यामागचा रंजक आणि तितकाच भीतीदायक प्रवास उलगडला.
नागपुरातील जलक्रांती परिषदेत नानांचे भाष्य: नागपूरमधील रेशीमबाग येथील कवीवर्य सुरेश भट सभागृहात ‘जलक्रांती परिषद’ आयोजित करण्यात आली होती. या परिषदेला केंद्रीय मंत्री नितीन गडकरी, पाणी फाऊंडेशनचा संस्थापक व अभिनेता आमिर खान, ‘नाम’ फाऊंडेशनचे अध्यक्ष नाना पाटेकर आणि अभिनेते मकरंद अनासपुरे उपस्थित होते. या कार्यक्रमात नाम फाऊंडेशनचे काम आणि देशातील जाती-धर्माच्या राजकारणावर बोलताना नानांनी आपल्या अभिनयाच्या प्रवासाला उजाळा दिला.
अप्पासाहेब बेलवलकर आणि हार्ट अटॅकचा संबंध: आपल्या भूमिकेविषयी बोलताना नाना म्हणाले, “मी त्यांना आधीच स्पष्ट सांगितले होते की, मी नटसम्राट नाटक करणार नाही, केवळ चित्रपट करेन. नटसम्राटमधील ‘अप्पासाहेब बेलवलकर’ ही भूमिका साकारणे शारीरिक आणि मानसिकदृष्ट्या अत्यंत थकवणारी आणि कमालीची आव्हानात्मक आहे. डॉ. श्रीराम लागू, दत्ता भट्ट, चंद्रकांत गोखले, यशवंत दत्त या सर्वच दिग्गजांनी हे नाटक केले आणि ते सर्व पुढे हार्ट अटॅकनेच गेले. नाटकाच्या प्रत्येक प्रयोगात कलाकाराला आपला जीव ओतावा लागतो, ज्यामुळे हृदयावर प्रचंड ताण येतो. जर मी या नाटकाचे १५ ते २५ प्रयोग केले असते, तर मी आज जिवंत नसतो.” याच तीव्रतेमुळे नाटकाला नकार देऊन आपण चित्रपटाची निवड केल्याचे त्यांनी स्पष्ट केले. तसेच दिवंगत अभिनेते विक्रम गोखले हे आपल्यापेक्षा कैक पटीने सरस अभिनेते होते, अशी पावतीही त्यांनी दिली.
नितीन गडकरींना थेट सवाल: या कार्यक्रमात नाना पाटेकर यांनी नेहमीच्या शैलीत थेट धर्म आणि जातीच्या राजकारणावर प्रहार केला. मंचावर उपस्थित असलेले केंद्रीय मंत्री नितीन गडकरी यांच्याकडे पाहत नानांनी थेट सवाल केला की, “गडकरी साहेब, तुम्हाला माहितीये का माझी जात काय आहे?” पुढे बोलताना ते म्हणाले की, मी आजवर कधीच कोणाला माझी जात सांगितली नाही आणि मला त्याची कधी गरजही वाटली नाही. या विधानाने त्यांनी उपस्थित प्रेक्षकांची मने जिंकली.