[ad_1]
( प्रगत भारत । pragatbharat.com)
‘एससीओ’ची ऑनलाइन बैठक मंगळवारी पंतप्रधान मोदी यांच्या अध्यक्षतेखाली पार पडली. या बैठकीस चीनचे अध्यक्ष शि जिनपिंग, रशियाचे अध्यक्ष व्लादिमिर पुतिन यांच्यासह पाकिस्तानचे पंतप्रधान शहबाज शरीफ हेसुद्धा उपस्थित होते. अध्यक्षस्थानावरून भाषण करताना परिषदेच्या सदस्य देशांमधील सहकार्यासह दहशतवादाच्या मुद्द्याकडेही मोदी यांनी या नेत्यांचे लक्ष वेधले. ‘परस्परांच्या गरजा समजून घेणे, तसेच उत्तम सहकार्य व समन्वयाच्या आधारे सर्व आव्हानांचे निराकरण करणे ही आपली सामूहिक जबाबदारी आहे. परिषदेतील सदस्य देशांनी एकमेकांचे सार्वभौमत्व व अखंडत्वासारख्या मूलभूत तत्त्वांचा आदर राखावा’, अशा शब्दांत पंतप्रधानांनी नामोल्लेख टाळत चीनलाही सुनावले.
चीन-पाकिस्तान इकॉनॉमिक कॉरिडोरअंतर्गत भारताच्या सीमेनजीक पायाभूत प्रकल्प हाती घेण्यात आल्याने याविषयी भारताने यापूर्वीच चिंता व्यक्त केली आहे. या पार्श्वभूमीवर मोदी यांनी चीन व पाकिस्तानच्या संबंधांविषयीही भाष्य केले. ‘अफगाणिस्तानातील स्थिती ही आपल्या सर्व देशांवर थेट परिणाम करणारी आहे. शेजारच्या देशांना अस्थिर करण्यासाठी किंवा मूलतत्त्ववादी विचारांना प्रोत्साहन देण्यासाठी अफगाण भूमीचा वापर होऊ नये’, अशी अपेक्षा मोदी यांनी व्यक्त केली. अन्न, इंधन व खतांच्या तुटवड्याच्या प्रश्नाला हात घालत पंतप्रधानांनी परिषदेची पुनर्रचना करण्याची गरज असल्याचे प्रतिपादन केले. यावेळी त्यांनी परिषदेचा स्थायी सदस्य म्हणून इराणचे स्वागत केले. या ऑनलाइन परिषदेस कझाकस्तान, किरगिझस्तान, ताजिकिस्तान, उझबेकिस्तानचे प्रतिनिधीही उपस्थित होते.
‘काही देश दहशतवाद्यांना आश्रय देतात. दहशतवादाचा प्रादेशिक व जागतिक शांततेला मोठा धोका आहे. कोणत्याही स्वरूपातील दहशतवादाविरोधात आपल्या सर्वांना सामूहिक लढा उभारायला हवा. परिषदेतील देशांनी दहशतवादाला होणारा अर्थपुरवठा रोखण्यासाठी सर्वंकष परस्पर सहकार्य करणे गरजेचे आहे. युवा पिढीमध्ये पसरवली जाणारी कट्टरता रोखण्यासाठीही पावले उचलायला हवीत’, अशी अपेक्षा मोदी यांनी व्यक्त केली.
भाजपने लोकसभा निवडणुकीसाठी आखला मोठा डाव; अचानक घेतला नेतृत्वबदलाचा निर्णय
‘राजनैतिक बेरजेसाठी वापर नको’ : शरीफ
‘दहशतवादाच्या मुद्द्याचा वापर राजनैतिक बेरजेसाठी करू नये. व्यक्तिगत, संघटनात्मक तसेच राष्ट्रीय स्तरावरील दहशतवादाचाही सर्वशक्तिनिशी व दृढ विश्वासाने मुकाबला करायला हवा’, असे प्रतिपादन पाकिस्तानचे पंतप्रधान शहबाज शरीफ यांनी यावेळी केले. ‘कोणत्याही कारणासाठी निष्पापांची हत्या करण्याचे समर्थन होऊ शकत नाही. दहशतवादाविरुद्धच्या लढ्यात पाकिस्तानने केलेल्या त्यागाची तुलनाच होऊ शकत नाही’, असे सांगतानाच, ‘स्थानिक राजकीय लाभासाठी धार्मिक अल्पसंख्याकांचे अस्तित्व पुसून टाकण्याची प्रथा रोखायला हवी’, असेही शरीफ यांनी कोणत्याही देशाचे नाव न घेता नमूद केले.
आता वेध केंद्रीय मंत्रिमंडळ विस्ताराचे, फडणवीसांच्या प्रमोशनची चर्चा, पटेलांना लॉटरी? शिंदे कुणाला संधी देणार?
[ad_2]
