जगभरात प्रत्येक ….आठपैकी एका मुलीवर होतोय लैंगिक अत्याचार  

pragatbharat@gmail.com

‘युनिसेफ’च्या अहवालातून धक्कादायक आकडेवारी समोर 

जिनिव्हा : ( pragatbharat.com) जगभरात प्रत्येक आठ मुलींपैकी एका मुलीवर लैंगिक अत्याचार होत असून, आतापर्यंत ३७ कोटी अल्पवयीन मुलींवर लैंगिक अत्याचार झाल्याचे वास्तव ‘युनिसेफ’ने जारी केलेल्या अहवालातून समोर आले आहे.

युनिसेफच्या अहवालातून मुले-मुली आणि महिलांवर होत असलेल्या बलात्कार आणि लैंगिक अत्याचाराच्या पीडितांची संख्या आणि व्याप्ती समोर आली आहे. ही माहिती कोणत्याही संवेदनशील माणसाला अस्वस्थ करणारी आहे. जगातील तब्बल ३७ कोटी अल्पवयीन मुलींना वयाची अठरा वर्षे पूर्ण होण्याआधी एकदातरी बलात्कार, लैंगिक अत्याचाराला सामोरे जावे लागले आहे,  म्हणजेच दर आठ मुलींमागे एका मुलीला या भयंकर अनुभवाचा सामना करावा लागला आहे. समाजमाध्यमाचा वापर करून छळ तसेच अन्य अत्याचारांची गणना केल्यास पीडित मुलींची संख्या ६५ कोटींच्या घरात जाईल, असे यात म्हटले आहे. यामुळे जगभरात बाल अधिकारांचे उल्लंघन किती मोठ्या प्रमाणात सुरु आहे, हे समोर आले आहे.

मुलांवरही होतोय अत्याचार  -अल्पवयीन मुलीच नव्हे तर मुलेही लैंगिक अत्याचाराचे बळी ठरले आहेत. जगभरात २४ कोटी मुलांना बालवयात लैंगिक अत्याचाराचा सामना करावा आहे. समाजमाध्यमातून होणारा छळ, बॅड टच आदी गैरप्रकारांची गणना केल्यास जगभरातील पीडित मुलांची संख्या ५३ कोटीपर्यंत आहे.मुलांवर बालपणातच होणार्‍या लैंगिक हिंसाचारासंदर्भातील ही आकडेवारी म्हणजे धोक्याची घंटा असून, त्याचा मुलांवर मोठा परिणाम होत असल्याचे युनिसेफने म्हटले आहे. या हिंसाचार आणि अत्याचारामुळे अनेक मुलींची आयुष्ये उद्ध्वस्त होत आहेत. दरम्यान, दीर्घकाळ लैंगिक अत्याचारामुळे पीडित व्यक्ती मानसिक दृष्टीने पूर्णपणे खचून जाते. अनेक प्रकारचे आजार जडू शकतात. यामुळे त्यांना चिंता, ताण आणि अनेक मानसिक आजारांचा सामना करावा लागतो. यातून बाहेर पडण्यासाठी पीडित अमली पदार्थांचा आसरा घेतात. त्यामुळे त्यांच्या मानसिक स्थितीवर गंभीर परिणाम होण्याची भीती असते.

Related posts