[ad_1]
( प्रगत भारत । pragatbharat.com)
पुरुष एकेरीच्या दुसऱ्या फेरीत आठव्या मानांकित प्रणॉयने किदाम्बी श्रीकांतचे आव्हान १९-२१, २१-९, २१-९ असे परतवून लावले. श्रीकांतने यापूर्वीच्या आठपैकी सहा लढतींत प्रणॉयला नमविले होते. मात्र, सध्या प्रणॉय फॉर्मात आहे. तो जागतिक क्रमवारीत दहाव्या क्रमांकावर पोहोचला आहे. जागतिक क्रमवारीत २०व्या क्रमांकावरील श्रीकांतने पहिली गेम जिंकून आश्वासक सुरुवात केली होती. मात्र, यासाठी त्याला प्रत्येक गुणासाठी चांगलाच लढा द्यावा लागला होता. प्रणॉयने १८-१७ अशी आघाडी मिळवली होती. मात्र, निर्णायक क्षणी श्रीकांतने आपला खेळ उंचावून पहिली गेम खिशात घातली. मात्र, पुढील दोन अगदीत एकतर्फी झाल्या. प्रणॉयच्या वेगवान खेळाशी श्रीकांतला जुळवूनच घेता आला नाही. पहिल्या गेममध्ये त्याची एवढी दमछाक झाली होती की प्रणॉयच्या चपळतेसमोर श्रीकांत निष्प्रभ ठरला. प्रणॉयने वर्चस्व घेतल्यावर श्रीकांतकडून चुका होण्यास सुरुवात झाली. प्रणॉयने दुसऱ्या गेममध्ये विश्रांतीस असलेली ११-४ आघाडी जास्तच भक्कम केली. निर्णायक गेममध्ये प्रणॉयने श्रीकांत प्रतिकारही करणार नाही याची खबरदारी घेतली. यापूर्वी प्रणॉयने श्रीकांतला २०१९ च्या जपानमध्ये हरवले होते. त्यानंतरच्या सामन्यात तो सातत्याने पराभूत झाला होता.
दुसऱ्या लढतीत लक्ष्य सेनने जपानच्या कांता त्सुनेयामावर २१-१४, २१-१६ अशी ५० मिनिटांत मात केली. तेराव्या क्रमांकावरील लक्ष्य सेनचा हा कांतावरील सलग दुसरा विजय ठरला. पहिल्या गेममध्ये लक्ष्यने कांताला फारशी संधीच दिली नाही. दुसऱ्या गेममध्ये कांताने आव्हान राखण्याचा आटोकाट प्रयत्न केला. मात्र, त्याच्याकडून टाळत्या येण्यासारख्या चुका झाल्या.
चिराग-सात्त्विकची आगेकूच
भारताच्या चिराग-सात्त्विक जोडीने आपली आगेकूच कायम राखली. त्यांनी पुरुष दुहेरीच्या दुसऱ्या फेरीत डेन्मार्कच्या जेप्पा बाय-लासे मोल्हेदे जोडीवर २१-१७, २१-११ अशी मात केली. जागतिक क्रमवारीत दुसऱ्या क्रमांकावर पोहोचलेल्या चिराग-सात्त्विकचा हा डेन्मार्कच्या जोडीविरुद्धचा सलग तिसरा विजय ठरला. महिला दुहेरीत जपानच्या नामी मात्सुयामा-चिहारू शिदा जोडीने त्रिसा जॉली-गायत्री गोपीचंद जोडीला २३-२१, २१-१९ असे पराभूत केले.
[ad_2]
