नागपूर (pragatbharat.com) : आगामी विधान परिषद निवडणुकीच्या (Vidhan Parishad Election 2026) पार्श्वभूमीवर महाराष्ट्रातील राजकीय घडामोडींना कमालीचा वेग आला आहे. नागपूर स्थानिक स्वराज्य संस्थेच्या जागेवर भाजपचे डॉ. राजीव पोतदार आणि काँग्रेसचे अतुल लोंढे यांच्यात थेट आणि चुरशीची लढत होत आहे. या निवडणुकीत भाजपची मते फुटू नयेत आणि संभाव्य ‘क्रॉसव्होटिंग’ (Cross-voting) रोखण्यासाठी भाजपने एक अत्यंत मोठा आणि धाडसी निर्णय घेतला आहे. नागपूर महानगरपालिकेतील आपल्या सर्व नगरसेवकांना पक्षाकडून थेट गोव्याला सहलीवर नेण्यात येणार असल्याची धक्कादायक आणि महत्त्वपूर्ण माहिती समोर आली आहे. विशेष म्हणजे, या संपूर्ण सहलीसाठी स्वतः नगरसेवकांकडूनच काही सहकार्य रक्कम (पिकनिकचे पैसे) घेण्यात आल्याची चर्चा राजकीय वर्तुळात आहे.
असा आहे भाजप नगरसेवकांचा संपूर्ण ‘टूर प्लॅन’: नगरसेवकांना स्थानिक राजकीय रणधुमाळी आणि प्रभावांपासून दूर ठेवण्यासाठी पक्षाने १० जून ते १७ जून असा एक आठवड्याचा विस्तृत कार्यक्रम आखला आहे:
- १० जून: रेल्वेने सर्व नगरसेवकांची नागपुरातून मुंबईकडे रवानगी केली जाईल.
- ११ जून: मुंबईत पोहोचल्यानंतर तिथून सर्व नगरसेवक गोव्यासाठी रवाना होतील.
- ११ ते १४ जून: तीन दिवस सर्व नगरसेवकांचा गोव्यातील रिसॉर्टमध्ये मुक्काम असेल.
- १४ जून: गोव्याहून मुंबईत परतल्यानंतर सर्व नगरसेवकांची मुख्यमंत्री देवेंद्र फडणवीस यांच्यासोबत विशेष बैठक होईल.
- १५ आणि १६ जून: मुंबईतील ‘रामभाऊ म्हाळगी प्रबोधिनी’ येथे नगरसेवकांसाठी दोन दिवसीय खास राजकीय प्रशिक्षण शिबिराचे (अभ्यासवर्ग) आयोजन करण्यात आले आहे.
- १७ जून: मतदानाच्या अवघ्या एक दिवस आधी सर्व नगरसेवक रेल्वेने नागपुरात परततील.
- १८ जून: विधान परिषद निवडणुकीसाठी प्रत्यक्ष मतदान पार पडेल.
काँग्रेसच्या दाव्यानंतर भाजप सतर्क: नागपूर महानगरपालिकेत भाजपचे संख्याबळ काँग्रेसपेक्षा जास्त असले, तरी काँग्रेस नेत्यांनी भाजपमध्ये अंतर्गत नाराजी असून मोठे क्रॉसव्होटिंग होईल, असा उघड दावा केला आहे. काँग्रेसचा हाच डाव उलटवून लावण्यासाठी आणि आपले संख्याबळ एकसंघ ठेवण्यासाठी भाजपने ही ‘केंबिंग’ रणनीती आखली आहे. मुंबईतील अभ्यासवर्गाच्या नावाखाली नगरसेवकांना पक्ष संघटन, प्रशासन आणि आगामी स्थानिक स्वराज्य संस्थांच्या निवडणुकांबाबत मार्गदर्शन केले जाणार असले, तरी मूळ हेतू आमदारांना आणि नगरसेवकांना विरोधकांच्या संपर्कापासून दूर ठेवणे हाच आहे, अशी जोरदार चर्चा सध्या सुरू आहे.
