[ad_1]
( प्रगत भारत । pragatbharat.com)
जागतिक क्रमवारीत तिसऱ्या क्रमांकावर असलेल्या सात्त्विक-चिराग जोडीने ताकुरो-युगो जोडीवर २१-१४, २१-१७ असा विजय मिळवला. ही लढत ४० मिनिटे चालली. जपानच्या जोडीला पाचवे मानांकन होते. सात्त्विक-चिराग जोडीचा हा ताकुरो-युगो जोडीविरुद्ध पाचव्या लढतीपैकी चौथा विजय ठरला. सात्त्विक-चिरागने गेल्या महिन्यात इंडोनेशिया ओपन सुपर-१००० स्पर्धेचे विजेतेपद पटकावले होते. त्यानंतरची ही त्यांची पहिलीच स्पर्धा होती.
पहिल्या गेममध्ये सुरुवातीला थोडी चुरस बघायला मिळाली. सलग तीन गुण घेऊन जपानच्या जोडीने ४-२ अशी आघाडी घेतली होती. भारतीय जोडीनेही सलग तीन गुण घेऊन आघाडी मिळवली. पुढील गुण घेऊन जपानच्या जोडीने ५-५ अशी बरोबरी साधली. यानंतर मात्र, सात्त्विक-चिरागने ‘टॉप गिअर’ टाकला. त्यांनी ताकुरो-युगो जोडीला संधीच दिली नाही. विश्रांतीला सात्त्विक-चिराग जोडीकडे ११-५ अशी आघाडी होती. नंतर आक्रमक स्मॅशेस, नेटजवळ सुरेख खेळ या जोरावर सात्त्विक-चिरागने पहिली गेम जिंकली. दुसऱ्या गेममध्ये ताकुरो-युगो जोडीने आव्हान राखण्याचा आटोकाट प्रयत्न केला. त्यामुळे या गेममध्ये अनेक चढ-उतार बघायला मिळाले. भारतीय जोडीकडून संथ सुरुवात झाली. त्यामुळे ते सुरुवातीला ३-६ने पिछाडीवर होते. पुढे सलग सहा गुण घेऊन आघाडी १४-९ने वाढवली. ताकुरो-युगो जोडीने अद्याप हार मानली नव्हती. त्यांनी भारतीय जोडींच्या चुकांचा फायदा घेऊन १६-१६ अशी बरोबरी साधली. निर्णायक क्षणी सात्त्विक-चिराग जोडीने संयम न गमावता खेळ केला आणि गेमसह लढत जिंकली.
सात्त्विक-चिरागची उपांत्य फेरीत दुसऱ्या मानांकित चीनच्या वेइ केंग लिअँग-चांग वांग जोडीविरुद्ध लढत होईल. वेइ-चांग जोडीने २०२१च्या जागतिक स्पर्धेत पुरुष दुहेरीचे विजेतेपद पटकावले आहे. सात्त्विक-चिराग यांनी कारकिर्दीत प्रथमच कोरिया ओपन स्पर्धेच्या उपांत्य फेरीत प्रवेश केला.
[ad_2]
