[ad_1]
( प्रगत भारत । pragatbharat.com)
वेस्ट इंडिजचा संघ याआधी एकदिवसीय विश्वचषक स्पर्धेसाठीही रात्र ठरू शकलेला नाही. पात्रता फेरीत त्यांची अवस्था वाईट झाली. भारताविरुद्ध वेस्ट इंडिजनं अतिशय कमकुवत संघ जाहीर केला आहे. टीम इंडिया या संघाला व्हाईटवॉश देईल, असं दिग्गज आधीच म्हणाले होते. पहिल्या कसोटी सामन्यात भारतानं विंडिजचा उडवलेला धुव्वा पाहता हा अंदाज खरा ठरण्याची दाट शक्यता आहे.
वेस्ट इंडिजचा संघ चाहते आणि दिग्गज खेळाडूंना कमकुवत वाटण्याचं कारण अनुभवी खेळाडूंचा संघात नसलेला सहभाग. निकोलस पूरन आणि शिमरॉन हेटमायर यांच्यासारखे कसलेले खेळाडू संघात नाहीत. या दोघांसह अन्य स्टार खेळाडू अमेरिकेत सुरू असलेल्या मेजर लीग क्रिकेटमध्ये खेळत आहेत. या स्पर्धेत एकूण ६ संघ आहेत. त्यातील ५ संघांमध्ये वेस्ट इंडिजचे एकूण ८ खेळाडू आहेत. अकिल हुसेन, सुनिल नरेन, आंद्रे रसेल, किरॉन पोलार्ड, निकोलस पूरन, शिमरॉन हेटमायर, हेडन वॉल्श ज्युनियर आणि ड्वेन ब्रावो मेजर लीगमध्ये खेळत आहेत.
नरेन, रसेल, पोलार्ड आणि ब्रावो आज काल वेस्ट इंडिजकडून फारसे खेळताना दिसत नाहीत. कसोटीत तर हे खेळाडू बऱ्याच कालावधीपासून खेळलेले नाहीत. पोलार्डनं तर पदार्पणही केलेलं नाही. मात्र या ८ पैकी ४ खेळाडू विंडिजच्या कसोटी संघात खेळू शकले असते. पूरन, हेटमायर, हुसेन, हेडन वॉल्श या ४ खेळाडूंचा समावेश विंडिजच्या संघात असता, तर कसोटी मालिका रंगतदार झाली असती.
हेटमायर शेवटचा कसोटी सामना नोव्हेंबर २०१९ मध्ये अफगाणिस्तानविरुद्ध खेळला. तो चांगल्या फॉर्ममध्ये आहे. पूरननं अद्याप कसोटी पदार्पण केलेलं नाही. मात्र एकदिवसीय सामन्यांमध्ये त्याची कामगिरी उत्तम होत आहे. गेल्या ७ एकदिवसीय सामन्यांत त्यानं २ शतकं झळकावली आहेत. त्यामुळे पूरनला कसोटी संघात स्थान देता आलं असतं. याशिवाय अकिल हुसेन आणि हेडन वॉल्श यांनाही संधी देता आली असती. पहिल्या कसोटीत भारताकडून रविचंद्रन अश्विन (१२) आणि रविंद्र जाडेजा (५) यांनी मिळून २० पैकी १७ गडी बाद केले. त्यामुळे विंडिजनं अकिल आणि हेडनला संधी दिली असती, तर भारतीय फलंदाजांना धावा काढणं कठीण गेलं असतं.
[ad_2]