[ad_1]
( प्रगत भारत । pragatbharat.com)
गांधीनगर येथे ‘सेमीकॉन इंडिया २०२३’ या परिषदेचे उद्घाटन केल्यानंतर पंतप्रधान मोदी बोलत होते. ‘जगातील प्रत्येक औद्योगिक क्रांती वेगवेगळ्या वेळी लोकांच्या आकांक्षांद्वारे प्रेरित होती. आता जी चौथी औद्योगिक क्रांती दिसत आहे, ती भारताच्या आकांक्षांवर आधारित असेल, असा मला विश्वास आहे. सेमीकॉन इंडिया कार्यक्रमाचा भाग म्हणून आम्ही प्रोत्साहन देत होतो. त्यात वाढ करण्यात आली आहे आणि आता सेमीकंडक्टर उत्पादन प्रकल्प भारतात उभारण्यासाठी तंत्रज्ञान कंपन्यांना ५० टक्के अर्थसाह्य मिळेल’, असे मोदी यांनी सांगितले.
‘एक वर्षापूर्वी लोक विचारायचे की, त्यांनी भारतीय सेमीकंडक्टर क्षेत्रात गुंतवणूक का करावी? आता ते विचारतात की, भारतात गुंतवणूक का करू नये? सेमीकंडक्टर क्षेत्रातील गुंतवणुकीसाठी भारत एक मोठा वाहक बनत आहे. विश्वासू आणि खात्रीशीर अशा चिपपुरवठा साखळीची जगाला गरज आहे. भारत आपली जागतिक जबाबदारी चांगल्या प्रकारे जाणतो. भारतातील ३०० महाविद्यालयांमध्ये सेमीकंडक्टर डिझाइनवरील अभ्यासक्रम सुरू केला जाणार आहे’, असेही मोदी म्हणाले.
भारताबद्दल आशावादी : फॉक्सकॉन
गांधीनगर : भारताच्या सेमीकंडक्टरसंबंधी पथदर्शी आराखड्याबाबत फॉक्सकॉन आशावादी असून, तैवान हा भारताचा सर्वांत विश्वासू भागीदार आहे व यापुढेही राहील, असे कंपनीने शुक्रवारी नमूद केले. ‘चला एकत्र मिळून काम करू. भारतात चिपसाठी परिवास तयार करणे हे मोठे काम आहे. इच्छा तिथे मार्ग असतो. चला हे काम एकत्र करू या’, असे कंपनीचे अध्यक्ष यंग लिऊ यांनी ‘सेमीकॉन इंडिया २०२३’ संमेलनात स्पष्ट केले.
सेमीकंडक्टर परिवास
‘भारतीय आकांक्षा देशाच्या विकासाला चालना देत आहेत. या आकांक्षांनी भारताला गरिबीचे झपाट्याने उच्चाटन करणारा आणि नव-मध्यमवर्गाची झपाट्याने वाढ करणारा देश बनवले आहे. त्यामुळे आम्ही आमच्या मित्र देशांसोबत मिळून विस्तृत आराखड्यावर काम करत आहोत. भारतात सेमीकंडक्टर परिवास तयार करण्यासाठी आम्ही विशेष प्रयत्न करत आहोत. देशाने नुकतीच ‘नॅशनल क्वांटम मिशन’ला मान्यता दिली असून, ‘नेशन रिसर्च फाउंडेशन विधेयक’ संसदेत मांडणार आहे’, असे मोदी यांनी यावेळी सांगितले.
गुजरातमधील प्रकल्पातून ५००० थेट रोजगार
‘गुजरातमध्ये देशातील पहिला सेमीकंडक्टर प्रकल्प उभारण्याची तयारी पूर्ण झाली आहे,’ असे अमेरिकी कंपनी ‘मायक्रॉन’ने म्हटले आहे. हा प्रकल्प कार्यान्वित झाल्यानंतर पाच हजार प्रत्यक्ष आणि १५ हजार अप्रत्यक्ष रोजगार मिळतील, अशी आशा कंपनीने व्यक्त केली आहे.
येथे आयोजित ‘सेमीकॉन इंडिया २०२३’ या कार्यक्रमात ‘मायक्रॉन’चे अध्यक्ष आणि मुख्य कार्यकारी अधिकारी संजय मेहरोत्रा यांनी ही माहिती दिली. ‘आमच्या प्रकल्पामुळे सेमीकंडक्टर क्षेत्रात गुंतवणुकीला चालना मिळेल. उत्पादन वाढेल आणि रोजगासंधीही वाढतील,’ असेही मेहरोत्रा म्हणाले. सध्या कंपनीची कार्यालये बेंगळुरू आणि हैदाराबादमध्ये आहेत. ‘गुजरातमधील प्रकल्प कार्यान्वित झाल्यानंतर आमचे सध्याचे मनुष्यबळ वाढेल,’ असेही त्यांनी नमूद केले. ‘मायक्रॉन’चा हा प्रकल्प फक्त जुळणी करणारा असेल.
‘भारतातील वातावरण पोषक’
सेमीकंडक्टर चिप उत्पादनासाठी भारतातील वातावरण अत्यंत पोषक आहे, असे फॉक्सकॉन या तैवानी कंपनीचे अध्यक्ष युंग लियू म्हणाले. फॉक्सकॉन ही जगातील सर्वांत मोठी सेमीकंडक्टर उत्पादक कंपनी आहे. लियू म्हणाले, ‘चिप उत्पादनासाठी भारतातील वातावरण अत्यंत पोषक आहे. प्रत्येक अनुभव कंपनीला एक पाऊल पुढे टाकण्यासाठी बळ देत आहे.’ ‘फॉक्सकॉन’ने अलीकडेच वेदान्ता कंपनीबरोबरची संयुक्त भागीदारी मोडून वेगळा प्रकल्प उभारण्याची घोषणा केली आहे. हा संयुक्त भागीदारी प्रकल्प पुढे गेला असता तर ती देशातील आजवरची सर्वांत मोठी गुंतवणूक ठरली असती आणि तो देशातील पहिला सेमीकंडक्टर उत्पादन प्रकल्प ठरला असता.
‘मेड इन इंडिय चिप अडीच वर्षांत’
‘पहिली मेड इन इंडिया सेमीकंडक्टर चिप येत्या अडीच वर्षांत आम्ही तयार करू,’ असा विश्वास वेदान्ता कंपनीचे अध्यक्ष अनिल अग्रवाल यांनी व्यक्त केला. आमच्या प्रकल्पाच्या पहिल्या टप्प्यात पाच अब्ज डॉलरची गुंतवणूक केली दाणार आहे. एकूण गुंतवणूक २० अब्ज डॉलरची असेल, असेही त्यांनी सांगितले. तंत्रज्ञानविषयक भागीदारीसाठी वेदान्ताने दोन-तीन कंपन्यांशी संपर्क साधला आहे. आमच्याकडे मुबलक निधी उपलब्ध आहेत. अनेकांनी आमच्याशी समभाग भागीदारी करण्याची तयारी दाखवली आहे. मात्र, आम्ही फक्त तंत्रज्ञान भागीदारी करू,’ असेही अग्रवाल यांनी स्पष्ट केले. वेदान्ताचा प्रकल्प गुजरातमधील ढोलेरा विशेष तंत्रज्ञान क्षेत्रामध्ये असणार आहे.
[ad_2]
