[ad_1]
( प्रगत भारत । pragatbharat.com)
मुंबई : टाटा समूहाने भारतीय लष्कराच्या मदतीसाठी एक उपग्रह (Tata Spy Satellite) तयार केला आहे. एखाद्या खासगी कंपनीने तयार केलेला हा भारताचा पहिला लष्करी दर्जाचा गुप्तचर उपग्रह आहे. आता तो उपग्रह लवकरच अवकाशात सोडला जाणार असून इलॉन मस्कची कंपनी स्पेसएक्सच्या (SpaceX) रॉकेटमधून हा उपग्रह प्रक्षेपित केला जाणार आहे. एप्रिल महिन्यामध्ये हा उपग्रह अवकाशात सोडण्यात येणार आहे.
ग्राउंड स्टेशन बांधण्याचे काम सुरू
इकॉनॉमिक्स टाईम्सने दिलेल्या वृत्तानुसार, हा उपग्रह टाटा समूहाची कंपनी Tata Advanced Systems Limited (TASL) ने विकसित केला आहे. गेल्या आठवड्यात त्याची पूर्ण तयारी झाली होती. आता या उपग्रहासाठी ग्राउंड स्टेशन बांधण्याचे कामही पूर्ण होणार आहे. ग्राउंड स्टेशनवरूनच स्पाय सॅटेलाईटचे नियंत्रण केले जाईल आणि सब-मीटर रिझोल्यूशनची प्रक्रिया केली जाईल.
या क्षमतेने सुसज्ज उपग्रह
एप्रिलमध्ये स्पेसएक्सच्या रॉकेटद्वारे हा उपग्रह प्रक्षेपित केला जाणार आहे. त्यासाठी हा उपग्रह फ्लोरिडाला पाठवला जात आहे. टाटा ॲडव्हान्स्ड सिस्टीम्स लिमिटेडने लॅटिन अमेरिकन कंपनी सॅटेलॉजिकसोबत भागीदारी करून हा उपग्रह विकसित केला आहे. हा उपग्रह 0.5 मीटरपर्यंतच्या रेझोल्यूशनमध्ये छायाचित्रे घेऊ शकतो. यामुळे लष्कराला सीमेवर लक्ष ठेवण्यास आणि व्यूहात्मक लक्ष्य निश्चित करण्यास मदत होईल.
लष्कराच्या या गरजा पूर्ण केल्या जातील
चीनसोबतच्या सीमेवर तणाव वाढल्यानंतर सीमेवर लक्ष ठेवण्यासाठी भारतीय लष्कराच्या गरजा वाढल्या आहेत. सध्या लष्कराला सॅटेलाइट इंटेलिजन्ससाठी अमेरिकन कंपन्यांवर अवलंबून राहावे लागते. इस्रोकडे सब-मीटर रिझोल्यूशन उपग्रह देखील आहेत, परंतु ते सैन्याच्या गरजेसाठी पुरेसे असल्याचे सिद्ध होत नाहीत. कारण सैन्याला अनेकदा मोठ्या कव्हरेजची आवश्यकता असते आणि काहीवेळा ही गरज तातडीची असते. अशा स्थितीत या उपग्रहामुळे लष्कराचे परदेशी कंपन्यांवरील अवलंबित्व कमी होईल आणि डेटा लगेच उपलब्ध होईल.
बंगळुरूमध्ये नियंत्रण केंद्राचे बांधकाम सुरू
या उपग्रहावर नियंत्रण ठेवण्यासाठी बंगळुरूमध्ये एक नियंत्रण केंद्र बांधले जात आहे. या नियंत्रण केंद्रातूनच उपग्रहाला नियंत्रित केलं जाईल. यासोबतच सीमेवर लक्ष ठेवण्यासाठी किंवा टार्गेट लॉक करण्यासाठी लष्कराला आवश्यक असलेल्या छायाचित्रांवरही नियंत्रण केंद्रात प्रक्रिया केली जाईल. गरज भासल्यास हा उपग्रह मित्र देशांनाही उपयोगी पडू शकतो.
ही बातमी वाचा:
अधिक पाहा..
[ad_2]
