[ad_1]
( प्रगत भारत । pragatbharat.com)
मणिपूरमध्ये वांशिक हिंसाचारादरम्यान दोन महिलांना विवस्त्र करून त्यांची जमावाने धिंड काढली होती. मे महिन्यात घडलेल्या या घटनेचा व्हिडीओ सोशल मीडियावर व्हायरल झाला होता. या पार्श्वभूमीवर केंद्रीय गृह मंत्रालयाने या प्रकरणाचा तपास सीबीआयकडे देण्याचा निर्णय घेतला आहे; तसेच या प्रकरणातील आरोपींविरुद्ध आसामच्या न्यायालयात खटला चालविण्याची विनंती पुढील आठवड्यात सर्वोच्च न्यायालयाला करण्यात येणार आहे आणि प्रतिज्ञापत्रही सादर केले जाणार आहे, असे अधिकाऱ्याने सांगितले. मणिपूरमधील हिंसाचार थांबवून जनजीवन सुरळीत करण्यासाठी केंद्रीय गृह मंत्रालय मैतेई आणि कुकी या दोन्ही गटांच्या संपर्कात असल्याचेही या अधिकाऱ्याने सांगितले.
या घटनेत ज्याने चित्रीकरण केले त्याला अटक करण्यात आली असून, त्याचा मोबाइल जप्त करण्यात आला आहे. या मोबाइलमुळे पुढील घटनांचा माग घेणे सोपे होणार आहे. विशेषत: व्हिडीओ प्रसारित कसा झाला हे समजणे शक्य होणार आहे. मणिपूर हिंसाचारातील पाच क्रूर घटनांचा तपास यापूर्वीच सीबीआयकडे देण्यात आला आहे.
मणिपूरबाबतची याचिका
सरन्यायाधीशांकडे करा
नवी दिल्ली : मणिपूरमधील लैंगिक अत्याचार आणि हिंसाचाराच्या चौकशीसाठी सर्वोच्च न्यायालयाच्या निवृत्त न्यायमूर्तींच्या अध्यक्षतेखाली समिती नेमण्याची विनंती करणारी याचिका सरन्यायाधीश धनंजय चंद्रचूड यांच्या अध्यक्षतेखाली खंडपीठापुढे सूचिबद्ध करण्याची सूचना सर्वोच्च न्यायालयाने गुरुवारी याचिकाकर्त्याला केली. वकील विशाल तिवारी यांनी ही याचिका दाखल केली असून, या प्रकरणाशी संबंधित अन्य याचिकांसोबत शुक्रवारी यावरही सुनावणी करण्याची विनंती त्यांनी केली होती.
‘कुकी-झो’ नागरिकांची निदर्शने
इम्फाळ : कुकी-झो समुदायाच्या नागरिकांनी मणिपूरच्या कंगपोकपी जिल्ह्यात जमातीसाठी स्वतंत्र प्रशासनाच्या मागणीसाठी गुरुवारी निदर्शने केली. तसेच, सरकारसोबत सस्पेन्शन ऑफ ऑपरेशन्स (एसओओ) करारावर स्वाक्षरी केलेल्या कुकी गटांशी केंद्राने योग्य ती चर्चा करावी, अशी मागणीही त्यांनी यावेळी केली. ‘ट्रायबल युनिटी सदर हिल्स’ बॅनरखाली कंगपोकपी आणि इम्फाळ पश्चिम जिल्ह्यांच्या सीमेवरील गंमगीफई गावात ही निदर्शने करण्यात आली.
‘महिला आयोगाला मणिपूर दिसत नाही?’
बेंगळुरू : कर्नाटकमधील पॅरामेडिकल कॉलेजच्या शौचालयात एका विद्यार्थिनीचा व्हिडीओ बनवण्यात आल्याच्या प्रकरणाची चौकशी करण्यासाठी राष्ट्रीय महिला आयोगाच्या सदस्य खुशबू सुंदर उडिपीमध्ये दाखल झाल्या आहेत. यावरून राज्याचे गृहमंत्री जी. परमेश्वर यांनी आयोगाला लक्ष्य केले. ‘जिथे महिलांना विवस्त्र करून त्यांची धिंड काढण्यात आली ते मणिपूर त्यांना दिसत नाही का, उडिपीमधील ही घटना मणिपूरमधील लैंगिक अत्याचाराएवढी गंभीर आहे का’, असे प्रश्न त्यांनी गुरुवारी उपस्थित केले.
[ad_2]
